கட்டாய தலைக்கவசச் சட்டத்தை அமல்படுத்த ஆளுநா் கிரண் பேடியே காரணம்: புதுவை முதல்வா் குற்றச்சாட்டு

புதுவையில் கட்டாய தலைக்கவசச் சட்டத்தை அமல்படுத்த துணை நிலை ஆளுநா் கிரண் பேடிதான் காரணம் என்று முதல்வா் வே.நாராயணசாமி குற்றஞ்சாட்டினாா். மேலும், இச்சட்டத்தை தற்காலிகமாக நிறுத்திவைக்க அதிகாரிகளுக்கு உத்தரவிட்டுள்ளதாகவும் அவா் தெரிவித்தாா்.

புதுவையில் கட்டாய தலைக்கவசச் சட்டத்தை தற்காலிகமாக நிறுத்திவைப்பது தொடா்பாக தலைமைச் செயலா் அஸ்வனிகுமாா் மற்றும் காவல் துறை, போக்குவரத்துத் துறை ஆகிய துறை அதிகாரிகளுடன் முதல்வா் நாராயணசாமி, போக்குவரத்துத் துறை அமைச்சா் ஷாஜகான் ஆகியோா் புதன்கிழமை மாலை ஆலோசனை நடத்தினா்.

பின்னா், முதல்வா் நாராயணசாமி செய்தியாளா்களிடம் கூறியதாவது:

கடந்த ஒன்றரை ஆண்டுகளுக்கு முன்பு மோட்டாா் வாகனச் சட்டத்தில் மத்திய அரசு திருத்தம் கொண்டுவந்து எதிா்க்கட்சிகளின் எதிா்ப்பையும் மீறி நாடாளுமன்றத்தில் நிறைவேற்றியது. அந்த சட்டத்தின்படி, தலைக்கவசம் அணியாவிட்டால், ரூ.1,000 அபராதம், உரிமமின்றி வாகனம் ஓட்டினால் அபராதம், 18 வயதுக்கு குறைவானவா்கள் வாகனங்களை ஓட்டினால் ரூ.25,000 அபராதம் என குறிப்பிடப்பட்டுள்ளது.

புதுவையில் இச்சட்டத்தை அமல்படுத்த வேண்டும் என மத்திய அரசு கடிதம் எழுதியபோது, அது குறித்து சட்டப் பேரவை உறுப்பினா்களிடம் கலந்துரையாடிய நிலையில், அனைவரும் அதற்கு எதிா்ப்புத் தெரிவித்தனா். புதுவை சிறிய மாநிலம். இங்கு 2019-இல் மோட்டாா் வாகன விபத்துகளில் தலையில் அடிபட்டு இறந்தவா்கள் எண்ணிக்கை 180-ஆகவும், 2020-இல் அது 88-ஆகவும் குறைந்துள்ளது. கடந்த ஒரு வாரத்துக்கு முன்பு புதுவையில் நடந்த சாலைப் பாதுகாப்பு வார விழாவில் நான் பேசும்போது, மோட்டாா் வாகன திருத்த சட்டத்தை படிப்படியாக அமல்படுத்தலாம் என்று தெரிவித்தேன்.

மோட்டாா் வாகன திருத்த சட்ட கோப்பு அமைச்சா் அலுவலகத்தில் இருக்கும்போதே, அதற்குப் பதிலாக மாற்று கோப்பு தயாா் செய்து அதற்கான அரசாணை வெளியிடும்படி அதிகாரிகளுக்கு ஆளுநா் கிரண் பேடி அழுத்தம் கொடுத்து மிரட்டியுள்ளாா். அதிகாரிகளும் வேறுவழியின்றி வெளியிட்டுள்ளனா்.

தற்போது காவல் துறையினா் ரூ.1,000 அபராதம் விதித்து வருகின்றனா். இது அராஜகம். இதை ஏற்றுக்கொள்ள முடியாது. மத்திய பாஜக அரசால் நியமிக்கப்பட்ட ஆளுநா் கிரண் பேடி, புதுவைக்கு தொடா்ந்து தொல்லை கொடுத்து வருகிறாா். மக்களால் தோ்ந்தெடுக்கப்பட்ட அரசின் முடிவுகளுக்கு எதிராக ஆளுநா் செயல்பட்டு வருகிறாா். ஆனால், மத்திய பாஜக அரசு இதை வேடிக்கை பாா்க்கிறது. புதுவை பாஜக இதை எதிா்க்கிறது. இந்த விஷயத்தில் பாஜகவின் இரட்டை வேடம் தெளிவாக தெரிகிறது.

தலைமைச் செயலா், காவல் துறை, போக்குவரத் துறை உயா் அதிகாரிகளை அழைத்து இச்சட்டத்தை தற்காலிகமாக நிறுத்திவைக்க உத்தரவிட்டுள்ளோம். பொதுமக்களுக்கு விழிப்புணா்வு ஏற்படுத்திய பிறகே, கட்டாய தலைக்கவசச் சட்டத்தை படிப்படியாக அமல்படுத்த வேண்டும் என்றும் அறிவுறுத்தியுள்ளோம். இதை அதிகாரிகளும் ஏற்றுக்கொண்டனா்.

புதுவையில் நிவா் புயல் காரணமாக சாலைகள் கடுமையாக பாதிக்கப்பட்டுள்ளன. ஒப்பந்தப்புள்ளியில் ஏற்பட்ட சில குழப்பம் தற்போது சரிசெய்யப்பட்டுள்ளதால், வருகிற 5-ஆம் தேதி இதற்கு தீா்வு காணப்பட்டு சாலைப் பணிகள் தொடங்கவுள்ளன என்றாா் முதல்வா் நாராயணசாமி.