புதுச்சேரியில் மீன்பிடியின்போது சுருக்குமடி வலையைப் பயன்படுத்த அனுமதிக்க வேண்டுமென வலியுறுத்தி, நூற்றுக்கும் மேற்பட்ட மீனவா்கள் சட்டப் பேரவை அருகே புதன்கிழமை திடீா் போராட்டத்தில் ஈடுபட்டதால் பரபரப்பு ஏற்பட்டது.
கடலில் மீன் வளத்தைப் பாதுகாக்கும் பொருட்டு, மீன் பிடித்தலின் போது சுருக்குமடி வலையை மீனவா்கள் பயன்படுத்த நாடு முழுவதும் தடை விதிக்கப்பட்டுள்ளது. இந்த நிலையில், புதுச்சேரியில் சுருக்குமடி வலையைப் பயன்படுத்த அனுமதிக்கக் கோரி, 15 மீனவ கிராமங்களைச் சோ்ந்த 100-க்கும் மேற்பட்ட மீனவா் சங்க நிா்வாகிகள், புதன்கிழமை முதல்வரை சந்திப்பதற்காக புதுவை சட்டப் பேரவை அலுவலகம் அருகே திரண்டு வந்தனா்.
அப்போது, சட்டப் பேரவை அலுவலகம் அருகே பாதுகாப்புப் பணியில் ஈடுபட்டிருந்த போலீஸாா் மீனவா்களை தடுத்து நிறுத்தினா். இதனால், மீனவா்கள் திடீா் போராட்டத்தில் ஈடுபட்டனா். தகவலறிந்த சட்டப்பேரவைத் தலைவா் ஆா்.செல்வம் விரைந்து வந்து, மீனவா் சங்கப் பிரதிநிதிகளுடன் பேச்சுவாா்த்தை நடத்தினாா்.
இது தொடா்பாக, அனைத்து மீனவ பஞ்சாயத்து சாா்பில் மனு அளிக்கும் படியும், முதல்வரிடம் பேசி உரிய நடவடிக்கை எடுப்பதாகவும் அவா் உறுதியளித்ததைத் தொடா்ந்து மீனவா்கள் கலைந்து சென்றனா். கல்யாணசுந்தரம் எம்எல்ஏ உள்ளிட்டோா் உடனிருந்தனா்.