புதுச்சேரி: கரோனா தொற்றால் பாதிக்கப்பட்டு சென்னை தனியாா் மருத்துவமனையில் சிகிச்சை பெற்று வரும் புதுவை முதல்வா் என்.ரங்கசாமியின் உடல் நலம் குறித்து துணைநிலை ஆளுநா் (பொ) தமிழிசை சௌந்தரராஜன் திங்கள்கிழமை கேட்டறிந்தாா்.
புதுவை மாநில முதல்வராக கடந்த 7-ஆம் தேதி என்.ஆா்.காங்கிரஸ் தலைவா் என்.ரங்கசாமி பதவியேற்றாா். இந்த நிலையில், அவருக்கு உடல்நிலை பாதிக்கப்பட்டது.
இதையடுத்து, அவா் சனிக்கிழமை கரோனா பரிசோதனை மேற்கொண்டாா். அவருக்கு தொற்றிருப்பது ஞாயிற்றுக்கிழமை உறுதி செய்யப்பட்டதால், உடனடியாக அவா் சென்னையில் உள்ள தனியாா் மருத்துவமனையில் அன்று மாலையே அனுமதிக்கப்பட்டாா். அவருக்கு அங்கு, தீவிர சிகிச்சை அளிக்கப்பட்டு வருகிறது.
அவரது உடல் நிலை குறித்து என்.ஆா்.காங்கிரஸ் மாநிலச் செயலா் என்.எஸ்.ஜெ.ஜெயபால் கூறியதாவது:
முதல்வா் ரங்கசாமிக்கு பெரிய அளவில் தொற்று பாதிப்பில்லை என மருத்துவா்கள் கூறினா். ஒரு வாரம் ஓய்வெடுத்தால் சரியாகிவிடும் என்பதால், அச்சம் கொள்ளத் தேவையில்லை. முதல்வா் ரங்கசாமி விரைவில் குணமடைந்து வீடு திரும்பி, மக்கள் பணியாற்றுவாா் என்று தெரிவித்தாா்.
இந்த நிலையில், புதுவை துணைநிலை ஆளுநா் (பொ) தமிழிசை செளந்தரராஜன், தொலைபேசியில் தொடா்பு கொண்டு முதல்வரின் உடல் நலம் குறித்தும், அவருக்கு அளிக்கப்படும் சிகிச்சை முறைகள் குறித்தும் கேட்டறிந்தாா். மேலும், அவா் விரைவில் பூரண குணமடைந்து மக்கள் பணியாற்ற இறைவனை பிராா்த்திக்கிறேன் என்று தெரிவித்தாா்.
இதனிடையே, துணைநிலை ஆளுநா் தமிழிசை சௌந்தரராஜன், தனக்கு கரோனா அறிகுறி இல்லாத நிலையிலும், முன்னெச்சரிக்கையாக திங்கள்கிழமை கரோனா பரிசோதனை செய்து கொண்டாா் என்று ஆளுநா் மாளிகை செயலகம் தெரிவித்தது.
ஆளுநா் தமிழிசை ஏற்கெனவே கரோனா தடுப்பூசி செலுத்திக் கொண்டாா் என்பது குறிப்பிடத்தக்கது.