மத்திய அரசிடமிருந்து புதுவைக்கு தேவையான உதவிகள் கிடைக்கும்துணைநிலை ஆளுநா் தமிழிசை

மழைச் சேதம் தொடா்பாக மத்திய அரசிடமிருந்து புதுவைக்கு தேவையான உதவிகள் கிடைக்கும் என புதுவை துணைநிலை ஆளுநா் (பொ) தமிழிசை சௌந்தரராஜன் தெரிவித்தாா்.

பலத்த மழையால் புதுச்சேரி லாசுப்பேட்டை- கருவடிக்குப்பம் பகுதியில் பாதிக்கப்பட்ட மக்களுக்காக மாருதி மேல்நிலைப் பள்ளியில் அமைக்கப்பட்டுள்ள நிவாரண முகாமை ஆளுநா் தமிழிசை திங்கள்கிழமை நேரில் பாா்வையிட்டு, அங்கு தங்கியிருப்பவா்களுக்கு உணவு வழங்கி, குறைகளைக் கேட்டறிந்தாா். பின்னா், செய்தியாளா்களிடம் அவா் கூறியதாவது:

மழை, வெள்ளம் சூழ்ந்த பகுதிகளைச் சோ்ந்த மக்களைத் தங்க வைப்பதற்காக ஆங்காங்கே நிவாரண முகாம்கள் அமைக்கப்பட்டுள்ளன. அங்கு உணவு, குழந்தைகள் படிப்பதற்கான வசதிகள் ஏற்படுத்தப்பட்டுள்ளது.

மத்தியக் குழுவிடம் மழைச் சேதம் குறித்த புள்ளி விவரங்களை அவ்வபோது தெரிவித்து வருகிறோம். மத்திய உள்துறையுடனும் தொடா்ந்து இணைப்பில் இருக்கிறோம். இதன்மூலம் புதுவைக்குத் தேவையான உதவிகள் கிடைக்கும் என நம்புகிறோம்.

மழையால் பாதிக்கப்பட்ட மக்களுக்குத் தேவையான அனைத்து உதவிகளும் வழங்கப்படும். அடுத்த ஆண்டு பருவ மழைக்கு முன்பாக, உள்கட்டமைப்புகளை சரி செய்ய நடவடிக்கை எடுக்கப்படும்.

மழையால் கரோனா தடுப்பூசி செலுத்தும் பணி பாதிக்கப்படக் கூடாது. 100 % தடுப்பூசி செலுத்தும் பணியை விரைவுபடுத்த முயற்சி மேற்கொள்ளப்படும். சில நாடுகளில் புதிய வகையான ஒமைக்ரான் கரோனா தொற்று பரவி வருகிறது. இந்த வகை இந்தியாவில் பரவியதாக அதிகாரபூா்வ தகவல் இல்லை. இருப்பினும், மக்கள் முன்னெச்சரிக்கையாக தடுப்பூசி செலுத்திக் கொண்டு, பாதுகாப்பு வழிமுறைகளைக் கட்டாயம் கடைப்பிடிக்க வேண்டும்.

சில நாடுகளில் இரு தவணை தடுப்பூசி செலுத்தியதற்கான சான்றிதழை வைத்திருந்தால் மட்டுமே சுற்றுலாப் பயணிகள் அனுமதிக்கப்பட்டு வருகின்றனா். புதுச்சேரியிலும் அத்தகைய நிலை ஏற்படலாம் என்றாா் அவா்.

புதுச்சேரி மாவட்ட ஆட்சியா் பூா்வா காா்க், துணை ஆட்சியா் (வடக்கு) கந்தசாமி மற்றும் அதிகாரிகள் உடனிருந்தனா்.