புதுவை பாஜக சாா்பில், மண்ணாடிப்பட்டு கொம்யூன் பஞ்சாயத்து உள்ளாட்சித் தோ்தல் தொடா்பான ஆலோசனைக் கூட்டம் திருக்கனூரில் செவ்வாய்க்கிழமை நடைபெற்றது.
கட்சியின் மாநிலத் தலைவா் வி.சாமிநாதன் தலைமை வகித்தாா். மாநிலச் செயலா் நாகராஜன் முன்னிலை வகித்தாா். இதில், மாநில உள் துறை அமைச்சா் ஏ.நமச்சிவாயம் ஆலோசனைகளை வழங்கிப் பேசியதாவது:
மண்ணாடிப்பட்டு கொம்யூன் பஞ்சாயத்துக்குள்பட்ட திருபுவனை, மண்ணாடிப்பட்டு ஆகிய தொகுதிகளில் போட்டியிடும் பாஜக, தே.ஜ. கூட்டணிக் கட்சி வேட்பாளா்களை, பாஜகவினா் ஒற்றுமையுடன் இருந்து வெற்றிபெற வைத்து, மண்ணாடிப்பட்டு கொம்யூன் பஞ்சாயத்து நமது கட்சியின் கோட்டை என்பதை நிருபிக்க வேண்டும். பாஜக, கூட்டணிக் கட்சிகளின் வேட்பாளா்களுக்கு எதிராக கட்சி நிா்வாகிகள் யாரேனும் செயல்படுவது தெரியவந்தால், அவா்கள் மீது நடவடிக்கை மேற்கொள்ளப்படும்.
தே.ஜ. கூட்டணியில் மண்ணாடிப்பட்டு கொம்யூன் பஞ்சாயத்துத் தலைவா் பதவியை பாஜகவுக்கு ஒதுக்க வலியுறுத்தப்பட்டுள்ளது. நீதிமன்ற உத்தரவின்படி தோ்தல் எப்போது நடைபெற்றாலும் பாஜகவினா் தயாா் நிலையில் இருக்க வேண்டும். இதற்காக வாா்டு வாரியாக 5 போ் கொண்ட பொறுப்பாளா்கள், கொம்யூன் அளவிலான உயா்நிலைக் குழுவினா் நியமிக்கப்பட உள்ளனா் என்றாா் அவா். கூட்டத்தில் பாஜக நிா்வாகிகள் பலா் கலந்துகொண்டனா்.