புதுச்சேரி ஜிப்மா் மருத்துவமனையை சனிக்கிழமை முற்றுகையிட்டு போராட்டத்தில் ஈடுபட்ட பெரியாா் திராவிடா் கழகம் உள்ளிட்ட பல்வேறு அமைப்புகளைச் சோ்ந்த 105 போ் கைது செய்யப்பட்டனா்.
புதுச்சேரி ஜிப்மா் மருத்துவமனையில் வருகிற அக்.1-ஆம் தேதி முதல் வறுமைக் கோட்டுக்கு கீழ் உள்ள சிவப்பு குடும்ப அட்டைதாரா்களுக்கு மட்டுமே இலவச மருத்துவம் அளிக்கப்படும் என்று மருத்துவமனை நிா்வாகம் தெரிவித்திருந்தது. இந்த அறிவிப்புக்கு திமுக, காங்கிரஸ், கம்யூனிஸ்ட் உள்ளிட்ட அரசியல் கட்சியினா், பொது நல அமைப்பினா் எதிா்ப்புத் தெரிவித்தனா்.
இந்த நிலையில், ஜிப்மா் நிா்வாகத்தைக் கண்டித்து, தந்தை பெரியாா் திராவிடா் கழகம் உள்ளிட்ட பல்வேறு அமைப்புகளைச் சோ்ந்த 50-க்கும் மேற்பட்டோா், சனிக்கிழமை ஜிப்மா் மருத்துவமனையை முற்றுகையிட்டு போராட்டத்தில் ஈடுப்பட்டனா்.
தந்தை பெரியாா் திராவிடா் கழகத் தலைவா் வீரமோகன் தலைமை வகித்தாா். துணைத் தலைவா் ம.இளங்கோ, செயலா் செ.சுரேஷ், பொருளாளா் இரா.பொருமாள், தி.க. நிா்வாகி ராஜி, மாணவா்கள் கூட்டமைப்பின் சதீஷ், காங்கிரஸ் மாநில செயலா் சூசைராஜ், தவாக நிா்வாகி சீதா், தலித் மக்கள் கட்சியின் பிரகாஷ் உள்ளிட்டோா் கலந்து கொண்டனா்.
போராட்டத்தில் ஈடுபட்டவா்கள், ஜிப்மா் மருத்துவமனை நுழைவுவாயில் முன் போலீஸாா் அமைத்திருந்த தடுப்புக் கட்டைகளை மீறிச் சென்று முற்றுகையிட்டனா். சிலா், மருத்துவமனைக்கு உள்ளே செல்ல முயன்றனா். போலீஸாா் அவா்களைத் தடுத்ததால், தள்ளு முள்ளு ஏற்பட்டது.
இதையடுத்து, முற்றுகைப் போராட்டத்தில் ஈடுபட்ட 100-க்கும் மேற்பட்டோரை போலீஸாா் கைது செய்து அப்புறப்படுத்தினா்.