புதுச்சேரியில் புதன்கிழமை கோலாகலமாக நடைபெற்ற குடியரசு தின விழாவில் துணைநிலை ஆளுநா் (பொ) தமிழிசை செளந்தரராஜன் தேசியக் கொடியேற்றினாா்.
புதுவை மாநிலத்தில் நாட்டின் 73-வது குடியரசு தின விழா புதன்கிழமை கோலகலமாக கொண்டாடப்பட்டது. புதுச்சேரி கடற்கரைச் சாலை காந்தி திடலில் நடைபெற்ற விழாவில், காலை 9.09 மணிக்கு துணைநிலை ஆளுநா் (பொ) தமிழிசை செளந்தரராஜன் தேசியக் கொடியை ஏற்றினாா். தொடா்ந்து, காவல் துறையினரின் அணிவகுப்பு மரியாதையையும் ஏற்றுக் கொண்டாா்.
பதக்கங்கள், விருதுகள்: புதுவை காவல் துறையில் சிறப்பாக பணியாற்றியதற்காக குடியரசுத் தலைவரின் காவல் பதக்கங்கள், நற்சான்றிதழ்களை காவல் கண்காணிப்பாளா் இரா.மோகன்குமாா், உதவி ஆய்வாளா் ப.பாஸ்கரன், ஓய்வு பெற்ற உதவி ஆய்வாளா் வி.சுதா்சனன் ஆகியோருக்கும், உள்துறை அமைச்சரின் காவல் பதக்கத்தை காவலா் சு.ஏழுமலைக்கும், துணைநிலை ஆளுநரின் காவல் பதக்கங்களை காவல் உதவி ஆய்வாளா்கள் எம்.சுரேஷ், கே.பழனிசாமி, துணை உதவி ஆய்வாளா் எஸ்.சுப்பிரமணிக்கும் தமிழிசை சௌந்தரராஜன் வழங்கினாா்.
மேலும், சிறந்த காவல் பணிக்கான ஆளுநரின் பாராட்டுச் சான்றிதழ்கள் துணை உதவி ஆய்வாளா் கே.சுப்ராயநாயுடு, ரேக்கடி நாகேஷ்வர ராவ், ஏ.நளினி, தலைமைக் காவலா் சுப்ரமணியேஷ்வர ராவ், காவலா் தாரகேஷ்வரி ஆகியோருக்கும் வழங்கப்பட்டது.
பிளஸ் 2 பொதுத் தோ்வில் (2021-22) அதிக மதிப்பெண்கள் பெற்ற அட்டவணை இன மாணவா்களுக்கான அம்பேத்கா் நினைவுப் பரிசு புதுச்சேரி குளூனி பள்ளி மாணவி ஏ.ஹரிணி, அமலோற்பவம் பள்ளி மாணவா் எம்.அகத்தியன் ஆகியோருக்கும், மாற்றுத் திறனாளிகளின் சேவையைப் பாராட்டும் வகையில், புதுச்சேரி நெல்லித்தோப்பைச் சோ்ந்த ஆா்.வெங்கடசுப்ரமணியனுக்கு சமூக நலத் துறை விருதும் வழங்கப்பட்டது.
காவல் துறை அணிவகுப்பு: காவல் துறை ஆயுதப் படைப் பிரிவு, போக்குவரத்து காவல் பிரிவு, காவல் படை ஆண்கள், பெண்கள் பிரிவு, பேண்டு இசைக் குழு, ஊா்க்காவல் படை ஆண்கள், பெண்கள் பிரிவு, தீயணைப்புத் துறை, முன்னாள் ராணுவத்தினா், தேசிய மாணவா் படை மாணவா்கள் படைப் பிரிவு ஆண்கள், பெண்கள் பிரிவினா், முன்னாள் இந்திய தேசிய மாணவா் படைப் பிரிவினரின் அணிவகுப்பு நடைபெற்றது.
தொடா்ந்து, புதுச்சேரி பாரதியாா் பல்கலைக்கூட மாணவா்களின் நாட்டுப்புற நடனம், லலிதா கலை, கைவினைக் குழுவினரின் மயிலாட்டம், அரிராமன் கலைக் குழுவினரின் மரக்கால் ஆட்டம் ஆகிய கலைநிகழ்ச்சிகளும் நடைபெற்றன.
நிகழாண்டு கரோனா தொற்று பரவல் தடுப்பு முன்னெச்சரிக்கையாக, மிகவும் எளிமையாக நடைபெற்ற விழா காலை 9 மணிக்குத் தொடங்கி 10 மணிக்கு நிறைவடைந்தது.
முதல்வா் பங்கேற்பு: விழாவில் புதுவை முதல்வா் என்.ரங்கசாமி, சட்டப்பேரவைத் தலைவா் ஆா்.செல்வம், எதிா்க்கட்சித் தலைவா் ஆா்.சிவா, அமைச்சா்கள் ஏ.நமச்சிவாயம், க.லட்சுமிநாராயணன், தேனீ சி.ஜெயக்குமாா், சாய் ஜெ.சரவணன்குமாா், சட்டப்பேரவை துணைத் தலைவா் பி.ராஜவேலு, எம்எல்ஏக்கள் ஜான்குமாா், ஏ.கே.டி.ஆறுமுகம், கே.எஸ்.பி.ரமேஷ், உ.லட்சுமிகாந்தன், தட்சிணாமூா்த்தி, எல்.கல்யாணசுந்தரம், ரிச்சா்டு, அனிபால் கென்னடி, எல்.சம்பத், வெங்கடேசன், ராமலிங்கம், அசோக்பாபு, சிவசங்கா், பிரகாஷ்குமாா், பிரான்ஸ் துணைத் தூதா் லிசேடல்போா்ட்பரே, தலைமைச் செயலா் அஸ்வனிகுமாா், புதுச்சேரி மாவட்ட ஆட்சியா் இ.வல்லவன், கூடுதல் டிஜிபி ஆனந்தமோகன் உள்ளிட்ட அதிகாரிகள், பொதுமக்கள் பலா் கலந்து கொண்டனா்.