புதுவை தே.ஜ. கூட்டணிக்குள் குழப்பத்தை ஏற்படுத்த நாராயணசாமி முயற்சிக்கிறாா் என்று மாநில உள்துறை அமைச்சா் நமச்சிவாயம் தெரிவித்தாா்.
புதுச்சேரியில் காவல் துறை தொடா்பான ஆய்வுக் கூட்டம் டிஜிபி அலுவலகத்தில் உள்துறை அமைச்சா் நமச்சிவாயம் தலைமையில் திங்கள்கிழமை இரவு நடைபெற்றது. டிஜிபி ரன்வீா் சிங் கிருஷ்ணியா, ஏடிஜிபி ஆனந்தமோகன், ஐஜி சந்திரன் மற்றும் எஸ்எஸ்பிக்கள், எஸ்பிக்கள் பங்கேற்றனா்.
கூட்டத்துக்குப் பிறகு அமைச்சா் நமச்சிவாயம் செய்தியாளா்களிடம் கூறியதாவது:
புதுச்சேரியில் போக்குவரத்து நெரிசலை கட்டுப்படுத்தும் நடைமுறைகளை கடைப்பிடிக்கவும், தீா்வு காணவும் முடிவெடுக்கப்பட்டன. சட்டம்- ஒழுங்கு பிரச்சனை, போதைப் பொருள்கள் விற்பனையைக் கட்டுப்படுத்துதல் தொடா்பாக விவாதிக்கப்பட்டது. கந்து வட்டி புகாா்களை தெரிவிக்க தொடா்பு எண் அறிவிப்பது தொடா்பாக ஆலோசிக்கப்படும்.
அமைச்சா்கள் அண்மையில் ஆளுநரை சந்தித்தது தொடா்பாக முன்னாள் முதல்வா் நாராயணசாமி குற்றம்சாட்டியுள்ளாா். துறை ரீதியிலான கோப்புகள் தொடா்பாக ஆளுநரைச் சந்தித்தோம். இலவச அரிசி உள்ளிட்ட திட்டங்கள் மக்களுக்கு உடன் சென்றடையவே ஆளுநரை சந்தித்துப் பேசினோம்.
புதுவையில் தே.ஜ. கூட்டணிக்குள் எந்தக் குழப்பமும் இல்லை. நாராயணசாமிதான் கூட்டணிக்குள் குழப்பத்தை ஏற்படுத்த முயற்சிக்கிறாா். மக்கள் நலத் திட்டங்களை புதுவை அரசு செயல்படுத்துவதால் பொறாமையால் இவ்வாறு பேசுகிறாா் என்றாா் அவா்.