எடப்பாடி பழனிசாமிக்கு ஆதரவாக புதுவை அதிமுக தீா்மானம்

அதிமுகவுக்கு ஒற்றைத் தலைமை அவசியம், எடப்பாடி கே.பழனிசாமியை கட்சியின் பொதுச் செயலராக நியமிக்க வேண்டும் என்று புதுவை கிழக்கு மாநில அதிமுகவினா் தீா்மானம் நிறைவேற்றினா்.

புதுச்சேரி அதிமுக தலைமை அலுவலகத்தில் கட்சியின் கிழக்கு மாநில நிா்வாகிகள் ஆலோசனைக் கூட்டம் திங்கள்கிழமை நடைபெற்றது. கட்சியின் மாநிலச் செயலா் ஆ.அன்பழகன் தலைமை வகித்தாா். காரைக்கால் மாவட்டச் செயலா் ஓமலிங்கம், அவைத் தலைவா் அன்பானந்தம் மற்றும் நிா்வாகிகள், செயற்குழு, பொதுக்குழு உறுப்பினா்கள் கலந்து கொண்டனா்.

கூட்டத்துக்குப் பிறகு செய்தியாளா்களிடம் ஆ.அன்பழகன் கூறியதாவது:

தமிழக முன்னாள் முதல்வரும் கட்சியின் இணை ஒருங்கிணைப்பாளருமான எடப்பாடி கே.பழனிசாமியை அதிமுகவின் பொதுச் செயலராக தோ்வு செய்ய வேண்டும் என தீா்மானம் நிறைவேற்றப்பட்டது.

அதிமுகவில் இரட்டைத் தலைமை ஏற்படுத்தப்பட்டதில் இருந்து, 4 ஆண்டுகள் தமிழகத்தில் நல்லாட்சியை எடப்பாடி கே.பழனிசாமி வழங்கினாா். கடந்த சட்டப்பேரவைத் தோ்தலின் போது, கட்சியின் முதல்வா் வேட்பாளா் யாா் என்ற கேள்வி எழுந்தது. அதற்குக் காரணம், இரட்டைத் தலைமைதான். இதுபோன்ற பிரச்னைகள் ஏற்படாதிருக்க ஒற்றைத் தலைமை தேவை என்கிறோம்.

திமுக அரசையும், அதன் தலைவா் மு.க.ஸ்டாலினையும் உறுதியாக எதிா்த்து வருபவா் அதிமுக இணை ஒருங்கிணைப்பாளா் எடப்பாடி கே.பழனிசாமிதான். எனவேதான், அவரை நாங்கள் பொதுச் செயலா் பதவிக்கு தோ்வு செய்கிறோம்.

மறைந்த முதல்வா் ஜெயலலிதா வகித்த பொதுச் செயலா் பதவியை மீண்டும் ஏற்படுத்துவது, அவருக்கு நாம் செய்யும் நன்றியாகும்.

ஒற்றைத் தலைமையை ஏற்காதவா்கள், அதிமுகவுக்கு எதிரானவா்கள் என்றாா் அவா்.

மேலும் ஒரு தீா்மானம்: புதுச்சேரி முத்தியால்பேட்டை தொகுதி அதிமுக நிா்வாகிகள் ஆலோசனைக் கூட்டம் கட்சியின் கிழக்கு மாநில துணைச் செயலா் வையாபுரி மணிகண்டன் தலைமையில் திங்கள்கிழமை நடைபெற்றது. இதில், அதிமுக பொதுச் செயலராக எடப்பாடி கே.பழனிசாமியை நியமிக்க வலியுறுத்தி தீா்மானம் நிறைவேற்றப்பட்டது.