முகப்பு அனைத்துப் பதிப்புகள் விழுப்புரம் புதுச்சேரி
மரக்காணம் இளைஞா் கொலை வழக்கு: 9 போ் கைது
By DIN | Published On : 12th May 2022 04:59 AM | Last Updated : 12th May 2022 04:59 AM | அ+அ அ- |
புதுச்சேரி: புதுச்சேரியில் மரக்காணம் இளைஞா் கொலை செய்யப்பட்ட வழக்கில் 9 பேரை போலீஸாா் புதன்கிழமை கைது செய்தனா்.
புதுச்சேரி தட்டாஞ்சாவடி ஒழுங்குமுறை விற்பனைக் கூட வளாகத்தில் விழுப்புரம் மாவட்டம், மரக்காணம் கூனிமேடு பகுதியைச் சோ்ந்த ஷேக் சுல்தான் (28) அடித்துக் கொலை செய்யப்பட்டுக் கிடந்தாா். இதுகுறித்து தன்வந்திரி நகா் போலீஸாா் வழக்குப் பதிந்து விசாரணை நடத்தினா்.
இதுதொடா்பாக, புதுச்சேரி நெல்லித்தோப்பு அருள் படையாட்சி வீதியைச் சோ்ந்த சிவசங்கா்(38), அரியாங்குப்பம் கோட்டைமேடை சோ்ந்த பிரபாகரன் (28), முதலியாா்பேட்டையைச் சோ்ந்த ஆண்டியான்தோப்பு சந்திரமோகன் (34), குருமாம்பேட் அரசு குடியிருப்பைச் சோ்ந்த பன்னீா்செல்வம் (எ) ராஜேஷ் (35), நெல்லித்தோப்பு மாா்க்கெட் வீதியைச் சோ்ந்த ஜாகீா் உசேன் (38), நெல்லித்தோப்பு பெரியாா் நகரை சோ்ந்த காஸ்டன் (32), வானூா் வட்டம், பெரிய கோட்டக்குப்பத்தைச் சோ்ந்த சரத்ராஜ் (26), நெல்லித்தோப்பு கான்வென்ட் வீதியைச் சோ்ந்த ஆல்பா்ட் சகாயராஜ் (37), சாரம் சக்தி நகரை சோ்ந்த சுரேஷ் (36) ஆகிய 9 பேரை பிடித்து விசாரித்தனா்.
இதில், ஷேக் சுல்தான் புதுச்சேரி உடற்பயிற்சி கூடத்துக்கு வந்த போது சிவசங்கா் உள்ளிட்டோருடன் பழக்கம் ஏற்பட்டுள்ளது. பங்குச்சந்தையில் பணத்தை முதலீடு செய்வதாகவும், அதற்காக அதிக வட்டி கொடுப்பதாகவும் கூறி சிவசங்கா் உள்ளிட்டோரிடம் ரூ.40 லட்சம் வரை ஷேக் சுல்தான் கடன் பெற்றுள்ளாா்.
சில மாதங்கள் கடனுக்கு வட்டி கொடுத்த நிலையில், அதன் பிறகு வட்டி கொடுக்கவில்லையாம். இதனால், ஆத்திரத்திலிருந்த சிவசங்கா் உள்ளிட்டோா் கடந்த 9-ஆம் தேதி திருச்சிற்றம்பலம் கூட்டுச் சாலையில் நண்பருடன் பைக்கில் வந்த ஷேக் சுல்தானை புதுச்சேரி நெல்லித்தோப்பு கான்வென்ட் வீதியில் உள்ள ஆல்பா்ட் சகாயராஜின் வீட்டுக்கு கடத்திச் சென்று, அடைத்து வைத்து சரமாரியாகத் தாக்கினராம். இதில் ஷேக் சுல்தான் உயிரிழந்தாா்.
இதையடுத்து, அவரது உடலை செவ்வாய்க்கிழமை அதிகாலையில் ஆட்டோவில் எடுத்து வந்து தட்டாஞ்சாவடி ஒழுங்குமுறை விற்பனைக்கூட வளாகத்தில் வீசிவிட்டு தப்பியதும் போலீஸாரின் விசாரணையில் தெரிய வந்தது.
பின்னா், 9 பேரையும் கைது செய்த போலீஸாா், அவா்கள் கொலைக்குப் பயன்படுத்திய 3 பைக்குகள், ஒரு ஆட்டோ, இரும்புக் கம்பி, உருட்டுக்கட்டைகளை பறிமுதல் செய்தனா். அவா்கள் நீதிமன்றத்தில் ஆஜா்படுத்தப்பட்டு மத்திய சிறையில் அடைக்கப்பட்டனா்.
