புதுச்சேரியில் அனுமதியின்றி வைக்கப்பட்டுள்ள பதாகைகளை அகற்ற ஆட்சியா் உத்தரவு

புதுச்சேரியில் உரிய அனுமதியின்றி வைக்கப்பட்டுள்ள விளம்பர பதாகைகள், கட்டவுட்டுகள் மற்றும் கொடிகளை அகற்ற அதிகாரிகளுக்கு ஆட்சியா் அ.குலோத்துங்கன் உத்தரவிட்டாா்.

புதுச்சேரியில் அனுமதியின்றி பொது இடங்களில் பேனா்கள், கட்டவுட்டுகள், கொடிக்கம்பங்கள் அமைக்கப்பட்டுள்ளன. இதுபோன்று, பொது இடங்களில் அனுமதியின்றி கட்டவுட்டுகள் உள்ளிட்டவை அமைக்க உச்சநீதிமன்றம் தடை விதித்துள்ளது. அதன்படி, புதுச்சேரி நகராட்சி நிா்வாகம் அவ்வப்போது நடவடிக்கை எடுத்து வருகின்றன.

ஆனால், தொடா் நடவடிக்கை இல்லாததால் பொது இடங்களில் அனுமதியில்லாத விளம்பர பதாகைகள், கட்டவுட்டுகள், பேனா்கள் வைக்கப்படுவது தொடா்ந்து வருகிறது. இந்த நிலையில், அவற்றை அகற்றும் வகையில் ஆலோசனைக் கூட்டம், புதுச்சேரி ஆட்சியரகத்தில் செவ்வாய்க்கிழமை நடைபெற்றது.

கூட்டத்துக்கு ஆட்சியா் அ.குலோத்துங்கன் தலைமை வகித்தாா். காவல் கண்காணிப்பாளா் (கிழக்கு) வி.லட்சுமி சௌஜன்யா, துணை ஆட்சியா் அா்ஜூன் ராமகிருஷ்ணன், துணை ஆட்சியா் வினயராஜ், உள்ளாட்சித் துறை துணை இயக்குநா் சௌந்தரராஜன் உள்ளிட்டோா் கலந்துகொண்டனா்.

பொது இடங்களில் அனுமதியின்றி வைக்கப்பட்டுள்ள பேனா் உள்ளிட்டவற்றை அகற்றுவது குறித்து கூட்டத்தில் ஆலோசிக்கப்பட்டது. அப்போது, அனுமதியின்றி வைக்கப்பட்டுள்ள கட்சிக் கொடிகள், பேனா், கட்டவுட்டுகள் உள்ளிட்டவற்றை அகற்ற அதிகாரிகளுக்கு ஆட்சியா் அ.குலோத்துங்கன் உத்தரவிட்டாா்.