Enable Javscript for better performance
விக்கிரவாண்டி இடைத் தோ்தல் கைப்பற்றும் முனைப்பில் அதிமுக; தக்க வைக்கும் முயற்சியில் திமுக!- Dinamani

சுடச்சுட

    

    விக்கிரவாண்டி இடைத் தோ்தல்: கைப்பற்றும் முனைப்பில் அதிமுக; தக்க வைக்கும் முயற்சியில் திமுக!

    By -இல. அன்பரசு  |   Published on : 19th October 2019 01:39 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    muthamizh-selv

    விக்கிரவாண்டி சட்டப்பேரவை இடைத் தோ்தலில் தொகுதியை தக்கவைக்கும் முயற்சியில் திமுகவும், அதைக் கைப்பற்றும் முனைப்புடன் அதிமுகவும் உள்ளதால், இரு கட்சிகளின் வேட்பாளா்களிடையே கடும் போட்டி நிலவி வருகிறது.

    விழுப்புரம் மாவட்டம், விக்கிரவாண்டி சட்டப்பேரவைத் தொகுதி உறுப்பினராக இருந்த திமுகவின் கு.ராதாமணி காலமானதைத் தொடா்ந்து, இந்தத் தொகுதிக்கு வருகிற 21-ஆம் தேதி இடைத் தோ்தல் நடைபெறுகிறது.

    தமிழகத்தில் கடந்த 2008-ஆம் ஆண்டின் தொகுதி மறு சீரமைப்புக்குப் பிறகு புதிதாக உருவாக்கப்பட்ட விக்கிரவாண்டி தொகுதி கிராமங்கள் நிறைந்தது. இந்தத் தொகுதி கடந்த 1952-ஆம் ஆண்டில் முதல் தோ்தல் நடந்தபோது விக்கிரவாண்டி தொகுதியாகத்தான் இருந்தது. பிறகு, 1967-இல் வளவனூா், 1977-இல் கண்டமங்கலம் தொகுதியானது. தொடா்ந்து, முகையூா் தொகுதியாக பெயா் மாற்றத்துடன் பிரிந்து உருமாறியது. மீண்டும் கடந்த 2008-இல் இருந்து விக்கிரவாண்டி தொகுதியாக மாறி இருக்கிறது.

    விக்கிரவாண்டி தொகுதியில் கடந்த 2011-இல் நடைபெற்ற சட்டப் பேரவைத் தோ்தலில் அதிமுக கூட்டணியில் போட்டியிட்ட மாா்க்சிஸ்ட் கம்யூனிஸ்ட் கட்சி வேட்பாளா் ஆா்.ராமமூா்த்தி 78,656 வாக்குகள் பெற்று வெற்றி பெற்றாா். இவரை எதிா்த்துப் போட்டியிட்ட திமுக வேட்பாளா் கு.ராதாமணி 63,759 வாக்குகள் பெற்று தோல்வியடைந்தாா்.

    தொடா்ந்து, 2016-இல் நடைபெற்ற சட்டப்பேரவைத் தோ்தலில் இந்தத் தொகுதியில் திமுகவின் கு.ராதாமணி 63,757 வாக்குகள் பெற்று வெற்றி பெற்றாா். அதிமுகவைச் சோ்ந்த ஆா்.வேலு 56,845 வாக்குகள் பெற்று தோல்வியடைந்தாா். அந்தத் தோ்தலில் பாமக, பாஜக, கம்யூனிஸ்ட் வேட்பாளா்கள் தனித்தனியே போட்டியிட்டனா்.

    இந்தத் தொகுதியில் 1952-ஆம் ஆண்டில் நடைபெற்ற தோ்தலில் உழைப்பாளா் கட்சியைச் சோ்ந்த ஏ.கோவிந்தசாமி வெற்றி பெற்றாா். அதன் பிறகு, அவா் திமுகவில் இணைந்து வெற்றி பெற்று தொகுதியைத் தக்க வைத்தாா். திமுகவுக்கு உதயசூரியன் சின்னத்தை வழங்கிய ஏ.கோவிந்தசாமி, அமைச்சராவும் இருந்து கடந்த 1969-இல் காலமானாா். அப்போது, இந்தத் தொகுதியில் இடைத் தோ்தல் நடைபெற்றது. இதில், அவரது மனைவி ஏ.ஜி.பத்மாவதி திமுக சாா்பில் போட்டியிட்டு வெற்றி பெற்றாா்.

    சம பலத்தில் அதிமுக - திமுக: விக்கிரவாண்டி தொகுதியில் ஏற்கெனவே திமுக 5 முறையும், அதிமுக 5 முறையும் வெற்றி பெற்றுள்ளன. தொகுதி மறு சீரமைப்புக்குப் பிறகு, விக்கிரவாண்டி பொதுத் தொகுதியாக மாறியதால், அதிமுக கூட்டணி ஒரு முறையும், திமுக ஒரு முறையும் வெற்றி பெற்றுள்ளன. இதனால், இந்தத் தொகுதியில் இரு கட்சிகளும் சம பலத்தில் உள்ளன.

    தற்போதைய இடைத் தோ்தலில் அதிமுக - திமுக இடையேதான் மீண்டும் போட்டி நிலவுகிறது. அதிமுக சாா்பில் இந்தத் தொகுதியைச் சோ்ந்த ஒன்றியச் செயலா் ஆா்.முத்தமிழ்செல்வனும், திமுக சாா்பில் விழுப்புரத்தைச் சோ்ந்த மாவட்டப் பொருளாளா் நா.புகழேந்தியும் களத்தில் உள்ளனா்.

    வன்னியா்கள் மிகுந்த தொகுதி: விக்கிரவாண்டி தொகுதியில் 1,11,607 ஆண் வாக்காளா்கள், 1,11,546 பெண் வாக்காளா்கள், 25 திருநங்கைகள் என 2.23 லட்சம் வாக்காளா்கள் உள்ளனா். இங்கு, 46 சதவீதம் வன்னியா் சமுதாயத்தினரும், 37 சதவீதம் தலித் சமுதாயத்தினரும், 13 சதவீதம் இதர சமுதாயத்தினரும் வசிக்கின்றனா்.

    இதனால், பெரும்பாலும் வன்னியா் சமுதாயத்தைச் சோ்ந்தவா்களையே அரசியல் கட்சிகள் வேட்பாளராக நிறுத்துகின்றன. இந்த முறையும் அதிமுகவும், திமுகவும் வன்னியா் சமுதாயத்தைச் சோ்ந்தவா்களையே களமிறக்கியுள்ளன.

    அதிமுகவின் சாதக, பாதகங்கள்: அதிமுகவுக்கு நிலையான வாக்கு வங்கி உள்ளது. தங்களது கூட்டணியில் உள்ள பாமக வாக்குகளும், கிராமங்களில் பரவலாக உள்ள தேமுதிகவின் ஆதரவும் சோ்ந்து எளிதான வெற்றியைப் பெற முடியும் என்ற எதிா்பாா்ப்பில் அதிமுக உள்ளது.

    இடைத் தோ்தலில் ஆளும் கட்சி வெற்றி பெற்றால், தொகுதிக்கு தொடா்ச்சியான நலத் திட்டங்கள் கிடைக்கும் என்ற வாக்குறுதிகளும் அதிமுகவுக்கு சாதகமாக உள்ளது. இதற்காகவே ஆளும் தரப்பு இந்தத் தொகுதியில் அண்மையில் ரூ.65 கோடியிலான திட்டப் பணிகளுக்கு அடிக்கல் நாட்டி, சாலை, பாலம், குடிநீா், கட்டடப் பணிகளை செய்து வருகிறது.

    விக்கிரவாண்டி தொகுதியில் அரசு மருத்துவக் கல்லூரியை திமுக கொண்டுவந்தாலும், அதில் அனைத்துத் துறைகளையும், கட்டடங்களையும் வழங்கி மேம்படுத்தியது அதிமுக என்பதும் அவா்களுக்கு சாதகம். நந்தன் கால்வாய் திட்டம் கிடப்பில் உள்ளதால் விமா்சிக்கப்பட்டு வரும் நிலையில், ரூ.40 கோடியில் கால்வாயைச் சீரமைக்க சட்டப்பேரவையில் முதல்வா் வெளியிட்ட அறிவிப்பு வரவேற்பைப் பெறுகிறது.

    கூட்டணிக் கட்சியினருடன் முழுமையான ஒருங்கிணைப்பு இல்லாததும், திமுகவுக்கு ஈடாக தோ்தல் களப்பணி இல்லாததும் அதிமுகவின் பலவீனமாகும்.

    ஒன்றியச் செயலரான வேட்பாளா் முத்தமிழ்செல்வன், ஒப்பந்தப் பணிகளை செய்து வருவதால், சொந்தக் கட்சியினரிடமே அதிருப்தி உள்ளது. ஆளும் கட்சி மீதான புகாா், குடிநீா் பிரச்னை, மத்திய பாஜகவின் நீட், ஹைட்ரோ காா்பன் திட்டங்கள் குறித்த விமா்சனங்களும் அதிமுகவுக்கு சவாலாக உள்ளன.

    திமுகவின் வியூகம்: விக்கிரவாண்டி தொகுதியில் திமுகவுக்கு கணிசமான வாக்கு வங்கி உள்ளது. கூட்டணியில் வி.சி.க. உள்ளது கூடுதல் பலம். காங்கிரஸ், கம்யூனிஸ்டுகளின் வாக்கு வங்கியும் கைகொடுப்பதால், மீண்டும் தொகுதியைத் தக்கவைக்கும் முனைப்பில் திமுக உள்ளது.

    வன்னியா்களின் வாக்குகளைக் கவா்வதற்காகவே அதே சமுதாயத்தைச் சோ்ந்த ஜெகத்ரட்சகன் எம்.பி. உள்ளிட்ட முன்னாள் அமைச்சா்களை தோ்தல் பொறுப்பாளா்களாக களமிறக்கி, ஆதரவு திரட்டி வருகின்றனா். கடந்த மக்களவைத் தோ்தல்போல, கூட்டு முயற்சி பலன் தரும் என்ற நம்பிக்கை திமுகவுக்கு உள்ளது.

    தொகுதியில் அரசு மருத்துவக் கல்லூரியைக் கொண்டு வந்தது திமுகவுக்கு பலம். விழுப்புரம் மாவட்ட திமுகவில் வன்னியா்களுக்கு முக்கியத்துவம் கொடுக்காததால் அதிருப்தி நிலவுகிறது. இந்தத் தொகுதியில் ஏற்கெனவே வெற்றி பெற்ற ஏ.ஜி.சம்பத்தை ஓரங்கட்டியது, ஏ.கோவிந்தசாமியின் நூற்றாண்டு விழாவை திமுகவினா் புறக்கணித்தது, தொடா்ந்து பாமகவுடன் மோதல் போக்கு போன்றவை திமுகவுக்கு பாதகமாக உள்ளது.

    இதைச் சமாளிக்கும் வகையில், அனைத்துக் கட்சியினரிடமும் நன்கு பழக்கமுடைய நீண்டகால திமுக பிரமுகரான வேட்பாளா் நா.புகழேந்தியை களமிறக்கியது திமுகவின் பலமாகியுள்ளது.

    வன்னியா்களுக்கு உள் ஒதுக்கீடு, ஏ.கோவிந்தசாமிக்கு மணிமண்டபம் போன்ற மு.க.ஸ்டாலினின் அறிவிப்புகள் விமா்சனத்துக்குள்ளானதே தவிர, எதிா்பாா்த்த வரவேற்பைத் தரவில்லை.

    பிற கட்சிகள்: நாம் தமிழா் கட்சியின் அறிமுக வேட்பாளா் கு.கந்தசாமி, தமிழ்ப் பேரரசு கட்சியின் வேட்பாளரான திரைப்பட இயக்குநா் வ.கெளதமன் போன்றோரும் களத்தில் உள்ளனா். இவா்கள் ஓரளவுக்கு வாக்குகளைப் பெற்றாலும் பெரிய தாக்கத்தை ஏற்படுத்த வாய்ப்பில்லை.

     

     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai