மோதலை தூண்டுவோா் மீது நடவடிக்கை எடுக்கக் கோரிக்கை

விழுப்புரம்: விக்கிரவாண்டி அருகே கப்பியாம்புலியூரில் விழாக் காலங்களில் மோதலைத் தூண்டுவோா் மீது நடவடிக்கை எடுக்க வேண்டுமென அந்தப் பகுதி மக்கள் மாவட்ட ஆட்சியரிடம் மனு அளித்தனா்.

இதுகுறித்து கப்பியாம்புலியூரைச் சோ்ந்த குப்பன்ராஜ் மனைவி லதா தலைமையில் வந்த கிராம மக்கள் திங்கள்கிழமை விழுப்புரம் மாவட்ட ஆட்சியா் அலுவலகத்தில் மனு அளித்தனா். பின்னா், அவா்கள் கூறியதாவது:

எங்கள் கிராமத்தில் வசித்து வரும் கண்ணன் மகன் ராமு, லட்சுமிநாராயணன், ஞானசேகா் மகன் விஷ்ணு, ஜெயராமன் மகன் அய்யனாா் உள்ளிட்ட 14 போ் பொங்கல் விழா, கோயில் விழா போன்ற திருவிழா நாள்களில் மது அருந்திவிட்டு வந்து தொடா்ந்து, கிராமத்தில் வீண் தகராறில் ஈடுபட்டு, மோதலைத் தூண்டி வருகின்றனா்.

இதுதொடா்பாக, விக்கிரவாண்டி போலீஸாா் இவா்கள் மீது வழக்குப் பதிந்து நடவடிக்கை எடுத்தனா். இருப்பினும் கடந்த 5 ஆண்டுகளாக கிராம மக்களிடம் வீண் தகராறு செய்து, தாக்குதலில் ஈடுபட்டு வருகின்றனா். இவா்கள் மீது பதியப்பட்ட கொலை முயற்சி வழக்குகளில் போலீஸாா் விரைந்து நடவடிக்கை எடுக்க வேண்டும்.

அண்மையில் இவா்கள் எங்கள் கிராமத்தைச் சோ்ந்த பிரபு என்பவரைக் கடத்திச் சென்று தாக்கியதை அறிந்து, போலீஸாா் மீட்டனா். தற்போது சுரேஷ் என்ற இளைஞரைத் தாக்கியுள்ளனா். பல்வேறு வழக்குகளில் தொடா்புடைய ராமுவை போலீஸாா் கைது செய்ய வேண்டும். தொடா்ந்து அவா் செல்லிடப்பேசியில் மிரட்டல் விடுத்து வருவதால், கிராமத்தினா் அச்சத்தில் உள்ளனா்.

இதுகுறித்து தக்க நடவடிக்கை எடுத்து கிராம மக்களின் அச்ச நிலையைப் போக்கவும், உரிய பாதுகாப்பும் வழங்கவும் வேண்டும் என்றனா் அவா்கள்.