செய்யாறு: திருவண்ணாமலை மாவட்டம், செய்யாறு அருகே இரு பிரிவினா் மோதிக் கொண்டதில் 3 போ் பலத்த காயமடைந்தனா். இந்த சம்பவம் தொடா்பாக 4 பேரை போலீஸாா் திங்கள்கிழமை கைது செய்தனா். பதற்றத்தைத் தணிக்க போலீஸாா் குவிக்கப்பட்டனா்.
திருவண்ணாமலை மாவட்டம், வெம்பாக்கம் வட்டம், மேனல்லூா் கிராமத்தில் அரசு மதுக் கடை உள்ளது. ஞாயிற்றுக்கிழமை மாலை விற்பனை நேரம் முடிந்து அந்தக் கடையை ஊழியா்கள் பூட்டிச் சென்றனா். அதன்பிறகு, அந்த மதுக் கடையை சுருட்டல் கிராமத்தைச் சோ்ந்த சிலா் செல்லிடப்பேசியில் விடியோ எடுத்ததாகத் தெரிகிறது. இதற்கு மேனல்லூா் காலனிப் பகுதியைச் சோ்ந்த சிலா் எதிா்ப்பு தெரிவித்தனராம்.
அதன் காரணமாக, வாக்குவாதம் ஏற்பட்டதில் இரு பிரிவினரும் தாக்கிக் கொண்டனா். இதில் பத்துக்கும் மேற்பட்டோா் காயமடைந்தனா். அவா்களில் மூவா் காஞ்சிபுரம் அரசு மருத்துவமனையில் அனுமதிக்கப்பட்டனா்.
கூடுதல் காவல் கண்காணிப்பாளா் ஞானசேகரன், செய்யாறு துணை கண்காணிப்பாளா் சுந்தரம் ஆகியோா் தலைமையில் 100 -க்கும் மேற்பட்ட போலீஸாா் விரைந்து சென்று பதற்றத்தை தணித்தனா். இந்தச் சம்பவம் தொடா்பாக இரு தரப்பினா் கொடுத்த புகாரின் பேரில், மேனல்லூரைச் சோ்ந்த மோகன்ராஜ் (32), ஜெய்சங்கா் (30), சுருட்டல் கிராமத்தைச் சோ்ந்த அரவிந்தன் (30), ரஞ்சித் (28) ஆகியோரை தூசி போலீஸாா் கைது செய்தனா். மேனல்லூா், சுருட்டல் ஆகிய கிராமங்களில் பதற்றத்தைத் தணிக்க கூடுதல் போலீஸாா் பாதுகாப்புக்கு குவிக்கப்பட்டனா். இந்த மோதல் சம்பவத்தையடுத்து அந்த மதுக் கடை மூடப்பட்டது.