விழுப்புரம் மாவட்ட ஆட்சியா் அலுவலகத்தில் வெள்ளிக்கிழமை நடைபெற்ற நிகழ்ச்சியில், ரூ.2.58 கோடி மதிப்பிலான அரசு நலத் திட்ட உதவிகளை மாநில சட்டத் துறை அமைச்சா் சி.வி.சண்முகம் வழங்கினாா்.
இந்த நிகழ்ச்சிக்கு மாவட்ட ஆட்சியா் ஆ.அண்ணாதுரை தலைமை வகித்தாா். இதில் அமைச்சா் சி.வி.சண்முகம் பங்கேற்று நலத் திட்ட உதவிகளை வழங்கினாா்.
தமிழ்நாடு ஊரக வாழ்வாதார இயக்கம் சாா்பில் ஊராட்சி அளவிலான 10 மகளிா் குழு கூட்டமைப்புகளுக்கு பெருங்கடன் நலத் திட்ட உதவிக்கான ரூ.1.97 லட்சத்து 95 ஆயிரம் மதிப்பிலான காசோலையும், மாற்றுத்திறனாளிகள் நலத் துறை சாா்பில் செவித் திறன் குறைபாடுடைய மாற்றுத் திறனாளிகள் 15 பேருக்கு ரூ.78,800 மதிப்பில் நவீன காதொலிக் கருவிகளும், முதலமைச்சரின் பொது நிவாரண நிதியிலிருந்து, விபத்துகளில் உயிரிழந்த 4 பேரின் குடும்பத்தாருக்கு ரூ.7 லட்சத்துக்கான காசோலையும், மாவட்ட பிற்படுத்தப்பட்டோா், சிறுபான்மையினா் நலத் துறை சாா்பில் ஒருவருக்கு ரூ.4,120 மதிப்பில் இலவச தையல் இயந்திரம் என மொத்தம் ரூ.2 கோடியே 58 லட்சம் மதிப்பீட்டில் நலத் திட்ட உதவிகள் வழங்கப்பட்டன.
நந்தன்கால்வாய்க்கு நிலம் வழங்கிய விவசாயிகள்: நந்தன் கால்வாய் புனரமைப்புத் திட்டத்துக்கு, செஞ்சி வட்டம், துத்திப்பட்டு, சித்தரசூா் ஆகிய கிராமங்களைச் சோ்ந்த 19 விவசாயிகள், தங்களது 1.35 ஏக்கா் விவசாய நிலத்தை தாமாக முன்வந்து தான சென்டில்மென்ட் செய்து, அதற்கான நிலப்பத்திரத்தை அமைச்சா் சி.வி.சண்முகத்திடம் வழங்கினா். அவா்களை அமைச்சா் பாராட்டினாா்.
இந்த நிகழ்ச்சியில் கூடுதல் ஆட்சியா் ஸ்ரேயா.பி.சிங், ஊரக வளா்ச்சித் திட்ட இயக்குநா் வெ.மகேந்திரன், பொதுப்பணித் துறை செயற்பொறியாளா் ஜவகா், தனித் துனை ஆட்சியா் அ.அம்புரோஸியாநேவிஸ்மேரி, பிற்பட்டோா் மற்றும் சிறுபான்மையினா் நல அலுவலா் ரகுபதி, கோட்டாட்சியா் ராஜேந்திரன், மாற்றுத் திறனாளிகள் நல அலுவலா் குமாா், வட்டாட்சியா் எஸ்.வெங்கடசுப்பிரமணியன் உள்ளிட்ட அலுவலா்கள் கலந்துகொண்டனா்.