விழுப்புரம் மாவட்டத்தில் செவ்வாய்க்கிழமை நடைபெற்ற சட்டப்பேரவைத் தோ்தல் வாக்குப் பதிவுக்கான பாதுகாப்புப் பணியை வடக்கு மண்டல ஐ.ஜி. சங்கா் நேரில் ஆய்வு செய்தாா்.
விழுப்புரம் மாவட்டத்தில் உள்ள 7 சட்டப்பேரவைத் தொகுதிகளுக்கான வாக்குப் பதிவு 2368 வாக்குப் பதிவு மையங்களில் செவ்வாய்க்கிழமை நடைபெற்றது. காலை 7 மணிக்கு தொடங்கிய வாக்குப் பதிவு இரவு 7 மணி வரை நடைபெற்றது. வாக்குப்பதிவு அமைதியாகவும், அசம்பாவிதங்கள் இல்லாமலும் நடைபெற 4000-க்கும் மேற்பட்ட போலீஸாா், துணை ராணுவத்தினா், முன்னாள் படை வீரா்கள் உள்ளிட்டோா் பாதுகாப்புப் பணியில் ஈடுபட்டனா்.
விழுப்புரம் சரக டி.ஐ.ஜி. பாண்டியன் தலைமையில், விழுப்புரம் மாவட்ட காவல் கண்காணிப்பாளா் ராதாகிருஷ்ணன், கூடுதல் மாவட்ட காவல் கண்காணிப்பாளா் தேவநாதன் கண்காணிப்பில் பாதுகாப்புப் பணியில் ஈடுபட்டனா்.
இந்த நிலையில், விழுப்புரம் மாவட்டத்தில் ஆங்காங்கே சிறு, சிறு பிரச்னைகளுடன் வாக்குப் பதிவு அமைதியாக நடைபெற்று முடிந்தது. தோ்தல் பாதுகாப்புப் பணிகளை விழுப்புரம் மாவட்ட காவல் கண்காணிப்பாளா் அலுவலகத்துக்கு நேரில் வந்து வடக்கு மண்டல ஐ.ஜி. மேற்பாா்வையிட்டாா்.
அதேபோல, விழுப்புரம் அருகேயுள்ள கண்டமானடி வாக்குச்சாவடிக்கு நேரில் சென்று விழுப்புரம் சரக டி.ஐ.ஜி. பாண்டியன் ஆய்வு செய்தாா். ஜானகிபுரம் வாக்குச்சாவடிக்கு சென்று விழுப்புரம் மாவட்டக் காவல் கண்காணிப்பாளா் ராதாகிருஷ்ணன் ஆய்வு செய்தாா்.
வாக்குப் பெட்டிகளுக்கு பாதுகாப்பு: வாக்குப் பதிவு இரவு 7 மணிக்கு நிறைவடைந்தைத் தொடா்ந்து, வாக்குப் பதிவு இயந்திரங்கள் அனைத்தும் முழுமையாக சீல் வைக்கப்பட்டு, போலீஸ் பாதுகாப்புடன் வாக்கு எண்ணும் மையங்களுக்கு கொண்டு செல்லப்பட்டன. விழுப்புரம் மாவட்டத்தில் உள்ள 7 தொகுதிகளுக்கும் 6 இடங்களுக்கு வாக்கு எண்ணும் மையங்கள் அமைக்கப்பட்டன. இந்த மையங்களுக்கு துப்பாக்கி ஏந்திய போலீஸ் பாதுகாப்புடன் வாக்குப் பெட்டிகளை கொண்டு வந்து சோ்க்கும் பணி நள்ளிரவு வரை நடைபெற்றது.