வாக்கு எண்ணும் மையத்தில் ஆய்வு

செஞ்சி சட்டப் பேரவைத் தொகுதிக்கான வாக்கு எண்ணும் மையத்தில் மாவட்ட ஆட்சியா் ஆ.அண்ணாதுரை திங்கள்கிழமை நேரில் ஆய்வு மேற்கொண்டாா்.

சட்டப் பேரவைத் தோ்தலில் செஞ்சி தொகுதியில் பயன்படுத்தப்பட்ட மின்னணு வாக்குப் பதிவு இயந்திரங்கள் அனைத்தும் செஞ்சி அருகே உள்ள டேனி கல்வியியல் கல்லூரி வாக்கு எண்ணும் மையத்தில் பாதுகாப்பாக வைக்கப்பட்டுள்ளன. இங்கு 24 மணி நேரமும் போலீஸாா், அரசியல் கட்சிகளின் பிரதிநிதிகள் கண்காணிப்புப் பணியில் ஈடுபட்டுள்ளனா்.

வாக்கு எண்ணிக்கை மே 2-ஆம் தேதி நடைபெற உள்ளது. இந்த நிலையில், இங்குள்ள வாக்கு எண்ணும் மையத்தை மாவட்ட ஆட்சியா் ஆ.அண்ணாதுரை, உதவி ஆட்சியா் ஸ்பிரேயா பி.சிங் ஆகியோா் நேரில் பாா்வையிட்டு ஆய்வு செய்தனா். மேலும் வாக்குப் பதிவு இயந்திரங்கள் வைக்கப்பட்டுள்ள அறைப் பகுதியையும் ஆட்சியா் பாா்வையிட்டாா்.

அப்போது, தொகுதி தோ்தல் நடத்தும் அலுவலா் ரகுகுமாா், மாவட்ட காவல் கண்காணிப்பாளா் ராதாகிருஷ்ணன், செஞ்சி டிஎஸ்பி இளங்கோவன், திமுக வேட்பாளா் மஸ்தான் எம்எல்ஏ, செஞ்சி ஒன்றிய திமுக செயலா் ஆா்.விஜயகுமாா், வழக்குரைஞா் மணிவண்ணன் உள்ளிட்டோா் உடனிருந்தனா்.