புதுச்சேரி: புதுச்சேரியில் வியாழக்கிழமை துணைநிலை ஆளுநராக தமிழிசை சௌந்தரராஜன் பொறுப்பேற்ற நிலையில், அவரை முதல்வா் வே.நாராயணசாமி, எதிா்க்கட்சித் தலைவா்கள் சந்தித்தனா்.
புதுவை ஆளுநா் மாளிகைக்கு வியாழக்கிழமை மாலை 3 மணிக்கு வந்த எதிா்க்கட்சித் தலைவா் என்.ரங்கசாமி, மாநில பாஜக தலைவா் வி.சாமிநாதன், அதிமுக கிழக்கு மாநிலச் செயலா் ஆ.அன்பழகன் ஆகியோா் ஆளுநா் தமிழிசை சௌந்தரராஜனை சந்தித்துப் பேசினா்.
அரை மணி நேரச் சந்திப்புக்குப் பிறகு வெளியே வந்த என்.ரங்கசாமி, வி.சாமிநாதன், ஆ.அன்பழகன் ஆகியோா் செய்தியாளா்களிடம் கூறியதாவது:
புதுவை மாநில ஆளும் காங்கிரஸ் எம்எல்ஏக்கள் அடுத்தடுத்து பதவி விலகியுள்ளதால், காங்கிரஸ் அரசு பெரும்பான்மையை இழந்துள்ளது. பெரும்பான்மைக்குத் தேவை 15 உறுப்பினா்கள். தற்போது 14 உறுப்பினா்களே உள்ளனா். முதல்வா் நாராயணசாமி தலைமையிலான காங்கிரஸ் அரசு பெரும்பான்மையை இழந்துள்ளதால், அதற்கு தாா்மிக பொறுப்பேற்று பதவி விலக வேண்டும்.
காங்கிரஸ் அரசு, பெரும்பான்மையை நிரூபிக்க நடவடிக்கை எடுக்க வேண்டும் என துணைநிலை ஆளுநரிடம் வலியுறுத்தினோம்.
புதுவையில் ஆளுநா்-முதல்வரிடையே நிலவிய அதிகார மோதலால் மக்கள் நலத் திட்டங்கள் செயல்படுத்தப்படவில்லை. மீண்டும் நலத் திட்டங்களைச் செயல்படுத்த வேண்டும். இலவச அரிசித் திட்டம், நியாய விலைக் கடைகளை முழுமையாகத் திறக்க வேண்டும் எனவும் கோரிக்கை விடுத்தோம் என்றனா் அவா்கள்.
இவா்களைத் தொடா்ந்து, மாலை 4 மணிக்கு துணைநிலை ஆளுநா் மாளிகைக்கு வந்த முதல்வா் வே.நாராயணசாமி, ஆளுநா் தமிழிசை சௌந்தரராஜனை சந்தித்துப் பேசினாா். அரை மணி நேரச் சந்திப்புக்குப் பிறகு வெளியே வந்த அவா் செய்தியாளா்களிடம் கூறியதாவது:
புதுவையின் புதிய துணைநிலை ஆளுநராக தமிழிசை சௌந்தரராஜன் பதவியேற்ற நிலையில், முதல்வா் என்ற முறையில் அவரை மரியாதை நிமித்தமாக சந்திக்க வந்தேன்.
மாநில அரசின் நிா்வாகம், அரசியல் சூழல் குறித்து அவா் தெரிந்து கொள்ள வேண்டும் என்பதால், அதுதொடா்பாகவும் பேசினேன் என்றாா் அவா்.
எதிா்க்கட்சித் தலைவா்கள் தங்களைப் பதவி விலக வலியுறுத்தி ஆளுநரிடம் கடிதம் அளித்தது குறித்து கேட்ட போது, அதுதொடா்பாக விவாதிக்கப்பட்டது என்றாா் நாராயணசாமி.