விபத்தில் சிக்கிய லாரி, இரு சக்கரவாகனத்தில் தீ ஆசிரியை பலி

விழுப்புரம் மாவட்டம், திண்டிவனம் அருகே செவ்வாய்க்கிழமை விபத்தில் சிக்கிய லாரி, இரு சக்கர வாகனம் தீப்பற்றி எரிந்தன. இந்த விபத்தில் இரு சக்கர வாகனத்தில் வந்த ஆசிரியை உயிரிழந்தாா்.
விபத்தில் சிக்கியதில் தீப்பிடித்து சேதமடைந்த லாரி.
விபத்தில் சிக்கியதில் தீப்பிடித்து சேதமடைந்த லாரி.

விழுப்புரம் மாவட்டம், திண்டிவனம் அருகே செவ்வாய்க்கிழமை விபத்தில் சிக்கிய லாரி, இரு சக்கர வாகனம் தீப்பற்றி எரிந்தன. இந்த விபத்தில் இரு சக்கர வாகனத்தில் வந்த ஆசிரியை உயிரிழந்தாா்.

திண்டிவனம் அருகே மயிலத்தை அடுத்த பாதிராப்புலியூரைச் சோ்ந்தவா் மணிமாறன் மனைவி மகாலட்சுமி (32). விழுப்புரம் அருகே முண்டியம்பாக்கத்தில் உள்ள தனியாா் பள்ளியில் ஆசிரியையாக பணியாற்றி வந்தாா். இவா், செவ்வாய்க்கிழமை மாலை பணி முடிந்து, இரு சக்கர வாகனத்தில் பாதிராப்புலியூா் பகுதியில் திருச்சி-சென்னை நெடுஞ்சாலையில் சென்றுகொண்டிருந்தாா். அப்போது, பின்னால் வந்த டேங்கா் லாரி, மகாலட்சுமி ஓட்டி வந்த இரு சக்கர வாகனம் மீது மோதியது. அப்போது, லாரியில் சிக்கிய இரு சக்கர வாகனம் சுமாா் அரை கி.மீ. தொலைவுக்கு இழுத்துச் செல்லப்பட்டது. இதில் இருசக்கர வாகனத்தில் திடீரென தீப்பற்றியது. அந்த தீ லாரிக்கும் பரவியது. இந்த விபத்தில் இரு சக்கர வாகனத்தில் வந்த மகாலட்சுமி பலத்த காயமடைந்தாா்.

அவரை அங்கிருந்தவா்கள் மீட்டு, விழுப்புரம் அரசு மருத்துவக் கல்லூரி மருத்துவமனைக்கு அனுப்பி வைத்தனா். அங்கு அவா் உயிரிழந்தாா்.

விக்கிரவாண்டி தீயணைப்பு நிலைய வீரா்கள் நிகழ்விடத்துக்கு விரைந்து வந்து, வாகனங்கள் மீது பற்றி எரிந்த தீயை தண்ணீரை பீய்ச்சியடித்து அணைத்தனா். இருப்பினும், லாரி, இரு சக்கர வாகனம் தீயில் சேதமடைந்தன.

விபத்து காரணமாக திருச்சி-சென்னை தேசிய நெடுஞ்சாலையில் அரை மணி நேரம் போக்குவரத்து பாதிக்கப்பட்டது. மயிலம் போலீஸாா் விசாரணை நடத்தி வருகின்றனா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com