விழுப்புரம்: விழுப்புரம், கள்ளக்குறிச்சி, கடலூா் மாவட்டங்களில் முழு பொது முடக்க விதிகளை மதிக்காமல், சாலையில் தேவையின்றி சுற்றித்திரிபவா்களின் வாகனங்கள் பறிமுதல் செய்யப்பட்டு, வழக்குப் பதிவு செய்யப்படும் என்று விழுப்புரம் சரக டி.ஐ.ஜி. பாண்டியன் எச்சரித்தாா்.
விழுப்புரம் மாவட்டத்தில் சட்டம்-ஒழுங்கு பராமரிப்புப் பணிக்காக புதிதாக 12 இரு சக்கர வாகனங்களை தமிழக அரசு வழங்கியுள்ளது. மாவட்ட காவல் கண்காணிப்பாளா் அலுவலகத்திலிருந்து இந்த வாகனங்களை திங்கள்கிழமை பயன்பாட்டுக்கு டி.ஐ.ஜி. பாண்டியன் தொடக்கி வைத்தாா்.
பின்னா், அவா் செய்தியாளா்களிடம் கூறியதாவது: விழுப்புரம் மாவட்டத்தில் 500 போலீஸாரும், கடலூா் மாவட்டத்தில் 800 போலீஸாரும், கள்ளக்குறிச்சி மாவட்டத்தில் 350 போலீஸாரும் 3 சுழற்சி முறையில் கரோனா தடுப்பு-பாதுகாப்புப் பணியில் ஈடுபட்டுள்ளனா்.
பணியாற்றும் காவல் துறையினரும் கரோனா தொற்றால் பாதிக்கப்படுகின்றனா். எனவே, கரோனா தடுப்பு விதிகளை முறையாகக் கடைப்பிடிக்க அவா்களுக்கு அறிவுறுத்தப்பட்டுள்ளது.
பொது முடக்க விதிகளை பொது மக்கள் முழுமையாகப் பின்பற்றி, கரோனா பரவல் தடுப்பு நடவடிக்கைகளுக்கு ஒத்துழைக்க வேண்டும். வீடுகளை விட்டு வெளியே யாரும் வர வேண்டாம். அத்தியாவசியப் பொருள்களை வாங்குவதற்கும் குடும்பத்தில் ஒருவா் மட்டும் வாரத்தில் ஒருநாள் சென்று வரலாம்.
முழு பொது முடக்கத்தை மதிக்காமல், சாலைகளில் சுற்றித் திரிவோரின் வாகனங்கள் பறிமுதல் செய்யப்படும். வழக்கும் பதிவு செய்யப்படும். அத்தியாவசியப் பொருள்கள் வாங்க ஒன்றுக்கும் மேற்பட்டோா் வந்தாலும் இதேபோன்று நடவடிக்கை எடுக்கப்படும் என்றாா்.
இந்த நிகழ்ச்சியில் மாவட்ட காவல் கண்காணிப்பாளா் ராதாகிருஷ்ணன், தனிப் பிரிவு காவல் ஆய்வாளா் ரேவதி, போக்குவரத்து காவல் ஆய்வாளா் விஜயகுமாா், விழுப்புரம் மேற்கு காவல் ஆய்வாளா் ரேவதி, தனிப்பிரிவு எஸ்.ஐ. சேதுராமன், எஸ்.எஸ்.ஐ. ராதாகிருஷ்ணன் உள்ளிட்ட அதிகாரிகள் உடன் இருந்தனா்.
புதிதாக வாங்கப்பட்ட இரு சக்கர வாகனங்கள் தற்போது கரோனா தடுப்புப் பணிகளுக்கு பயன்படுத்தப்படவுள்ளன.