நைலான் கயிறுகளாகும் நெகிழி சாக்குகள்!

கிராமங்களில் வாழும் பெண்களாலும் தொழில்முனைவோா்களாக மாற முடியும் என்பதை நிரூபித்து வருகின்றனா் விழுப்புரம் மாவட்டம், செஞ்சி அருகேயுள்ள ஆலம்பூண்டி ஊராட்சிக்குள்பட்ட சிக்காமேடு கிராமத்தைச் சோ்ந்த பெண்கள்.

தொழில் நிறுவனங்கள், மளிகைக் கடைகள், கட்டுமான பகுதிகளில் குப்பைத் தொட்டியில் வீசுவதற்காக வைக்கப்பட்டிருக்கும் நெகிழி சாக்குகளை வாங்கி வந்து, அவற்றிலிருந்து நைலான் கயிறுகளைத் தயாரிக்கின்றனா்.

விழுப்புரம், திண்டிவனம், திருவண்ணாமலை, ஆரணி, செஞ்சி, வேலூா் உள்ளிட்ட இடங்களுக்குச் சென்று அங்கு ஒரு நெகிழி சாக்கு ரூ.2-க்கு கொள்முதல் செய்கின்றனா். அவற்றை தங்களது வீட்டில் இருக்கும் பிரத்யேக இயந்திரத்தைக் கொண்டு நைலான் கயிறுகளாக தயாரித்து வருகின்றனா்.

இதுகுறித்து ஆலம்பூண்டி சிறு அளவிலான தொழில் தொகுப்பு செயலா் அ.வனஜா கூறியதாவது:

நெகிழி சாக்குகளை நைலான் கயிறுகளாக திரிக்கும் இயந்திரத்தை ரூ.50,000 முதல் ரூ.60,000 வரை விலை கொடுத்து வாங்கி வைத்திருக்கிறோம்.

4 சாக்குகளைத் திரித்தால் கால்நடைகளைக் கட்டுவதற்குத் தேவையான நைலான் கயிறை தயாரிக்க முடியும். ஒரு கயிறு ரூ.40 முதல் 60 வரை சந்தைகளில் விற்பனை செய்கிறோம்.

ஓா் இயந்திரத்தில் மூன்று போ் வேலை செய்ய வேண்டும். ஒரு கயிறு தயாரித்தால் ரூ.30 லாபம் கிடைக்கும். விழுப்புரம், திருவண்ணாமலை மாவட்டங்களில் உள்ள முக்கிய சந்தைகளுக்கு நாங்களே நேரடியாகச் சென்று கயிறுகளை விற்பனை செய்து வருகிறோம் என்றாா் வனஜா.

இந்தத் தொகுப்பின் பொருளாளா் ர.மலா்க்கொடி கூறியதாவது:

எங்கள் கிராமத்தில் மொத்தம் 45 வீடுகளில் இந்தக் கயிறு தயாரிப்பு இயந்திரங்கள் உள்ளன. தினமும் காலை 6 முதல் 9 மணி வரை மட்டுமே பகுதிநேர தொழிலாக நைலான் கயிறு உற்பத்தித் தொழிலை செய்து வருகிறோம். மீதமுள்ள நேரத்தில் எங்கள் வீட்டு வேலை மற்றும் பிற வேலைகளைத் தொடருவோம். தினமும் இந்த மூன்று மணி நேரத்தில் 60 முதல் 70 கயிறுகளைத் தயாரிக்க முடியும். பெண்கள் மட்டுமே இந்தத் தொழிலில் ஈடுபட்டு வருகிறோம் என்றாா்.

பெரும்பாலும் ஆடு, மாடுகளைக் கட்ட பயன்படுத்தும் நைலான் கயிறுகளைதான் இவா்கள் தயாரிக்கின்றனா். கூடுதல் நீளமான கயிறு தேவைப்படுவோா் முன்கூட்டியே ஆா்டா் கொடுத்தால் இவா்கள் உற்பத்தி செய்து தருகின்றனா். ஓரடிக்கு ரூ.2 என விலை நிா்ணயம் செய்து எத்தனை அடி வேண்டுமானாலும் நைலான் கயிறை வாங்கிக் கொள்ளலாம்.

இந்தப் பெண்கள் பகுதி நேரமாக இந்தத் தொழிலை செய்து வருவதால், வீடுகளில் இயந்திரத்தை வைத்து கயிறுகளை உற்பத்தி செய்து வருகின்றனா். மகளிா் திட்டம் மூலம் தனியாக தொழில்கூடம் கட்டி ஒரே இடத்தில் இயந்திரங்களை வைத்து கயிறு தயாரிக்கவும் திட்டமிட்டுள்ளோம். அதற்கான பணிகள் முழுவீச்சில் நடைபெற்று வருகின்றனா். ஒரே இடத்தில் இவா்கள் இயங்கினால் மத்திய, மாநில அரசுகளிடம் இருந்து கூடுதலாக வங்கிக் கடனை மானியத்தில் பெறலாம் என்று மகளிா் திட்டத்தின் தமிழக வாழ்வாதார இயக்க வட்டார வள இயக்குநா்த.ரஞ்சிதா தெரிவித்தாா்.