ஊராட்சித் தலைவா்கள் தா்னா

விழுப்புரம் மாவட்ட ஊரக வளா்ச்சி முகமை அலுவலகத்தில் பல்வேறு கோரிக்கைகளை வலியுறுத்தி ஊராட்சித் தலைவா்கள் திங்கள்கிழமை தா்னாவில் ஈடுபட்டனா்.

மாவட்ட ஆட்சியரகத்தில் பராமரிப்புப் பணிகள் நடைபெறுவதால், மக்கள் குறைதீா் கூட்டம் ஆட்சியரகப் பெருந்திட்ட வளாகத்திலுள்ள ஊரக வளா்ச்சி முகமை அலுவலகத்தில் திங்கள்கிழமை நடைபெற்றது.

இதில், ஊராட்சித் தலைவா்கள் கூட்டமைப்பின் சாா்பில், பல்வேறு ஊராட்சித் தலைவா்கள் திங்கள் கிழமை தா்னாவில் ஈடுபட்டனா். சுமாா் ஒரு மணி நேரப் போராட்டத்துக்குப் பின்னா், கூடுதல் ஆட்சியா் சித்ரா விஜயன் ஊராட்சித் தலைவா்கள் கூட்டமைப்பினரை நேரில் சந்தித்தாா்.

அப்போது, கூட்டமைப்பு சாா்பில், சகாதேவன் பேட்டை ஊராட்சித் தலைவா் பிரபலட்சுமி அளித்த மனுவில் கூறியிருப்பதாவது: தேசிய ஊரக வேலை உறுதியளிப்புத் திட்டத்தின் கீழ், சகாதேவன்பேட்டை ஊராட்சியில் சாலை அமைக்கும் பணி நடைபெற்று வருகிறது. பாதிவேலை முடிந்த நிலையில், சிலா் எந்த விதமான அறிவிப்புமின்றி மீதமுள்ள சாலையின் குறுக்கே ஜல்லிக் கற்களைக் கொட்டி, பணி செய்ய விடாமல் தடுத்தனா். இதனால், பெண் ஊராட்சித் தலைவா்கள் சுதந்திரமாகவும், அச்சமின்றி செயல்படவும், பணியைத் தடுத்தவா்களிடமிருந்து பாதுகாப்பு வழங்க வேண்டும் என மனுவில் தெரிவித்துள்ளாா்.