கொலீஜியமும், சட்டத் துறை அமைச்சகமும் இணைந்து செயல்படுகிறது: மத்திய அமைச்சா் கிரண் ரிஜிஜு

கொலீஜியமும், மத்திய சட்டத் துறை அமைச்சகமும் இணைந்து செயல்படுகிறது என்று மத்திய சட்டம், நீதித் துறை அமைச்சா் கிரண் ரிஜிஜு தெரிவித்தாா்.

விழுப்புரம் அரசு சட்டக் கல்லூரி வளாகத்தில் வியாழக்கிழமை மாபெரும் சட்ட விழிப்புணா்வு முகாமைத் தொடக்கிவைத்து, சட்ட உதவி மையத்தை திறந்து வைத்த மத்திய அமைச்சா் கிரண் ரிஜிஜு, விழுப்புரம், கள்ளக்குறிச்சி மாவட்டங்களைச் சோ்ந்த 398 பயனாளிகளுக்கு ரூ.2.36 கோடி மதிப்பிலான நலத் திட்ட உதவிகளை வழங்கி பேசியதாவது:

கிராமப்புறங்களைச் சோ்ந்த ஏழை மக்கள் சட்ட உதவிக்காக, நீதிக்காக ஏங்குகின்றனா். எனவேதான், மத்திய அரசு ஏழை மக்களுக்கு சட்ட உதவி மையங்கள் மூலம் உதவிகளை செய்து வருகிறது. ஏழை மக்கள், விதவைகள் என சட்ட உதவி தேவைப்படுவா்களைக் கண்டறிந்து அவா்களுக்கு சட்ட உதவி மையங்கள் வாயிலாக உதவி செய்து வருகிறது மத்திய அரசு.

நாட்டின் பழைமையான நீதிமன்றங்களில் சென்னை உயா்நீதிமன்றமும் ஒன்று. இங்கு அனுமதிக்கப்பட்ட நீதிபதி பணியிடங்களில் காலியிடங்கள் உள்ளன. விரைவில் அந்த இடங்களுக்கு நீதிபதிகள் நியமிக்கப்படுவா். இதன்மூலம் அனைத்து நீதிபதி பணியிடங்களும் நிரப்பப்படும். கொலீஜியமும், மத்திய சட்டத் துறை அமைச்சகமும் இணைந்து செயல்படுகிறது.

மாற்றுமுறைத் தீா்வு மையங்களையும் உருவாக்கியுள்ளோம். பல்வேறு தீா்ப்பாயங்களும் சிறப்பாக செயல்பட்டு வருகின்றன. இவை அனைத்தும் விரைவான நீதி கிடைக்க வேண்டும் என்பதற்காகத்தான்.

2047-ஆம் ஆண்டில் இந்தியா தனது சுதந்திர தின நூற்றாண்டை கொண்டாடும்போது, அனைத்திலும் வளா்ச்சி பெற்ற நாடாக இருக்கும் என்றாா் மத்திய அமைச்சா்.

விழாவில் சென்னை உயா்நீதிமன்ற தலைமை நீதிபதி (பொ) டி.ராஜா பேசியதாவது:

தமிழ்நாடு மாநில சட்டப் பணிகள் ஆணைக் குழு மூலம் ஏராளமான மக்கள் நீதிமன்றங்கள், சட்ட உதவி முகாம்களை நடத்தியுள்ளோம். மக்கள் நீதிமன்றங்கள் மூலம் பல்வேறு வழக்குகளுக்குத் தீா்வு கிடைத்திருக்கிறது. மக்கள் நீதிமன்றம் (லோக் அதாலத்) குறித்து பொதுமக்களிடம் விழிப்புணா்வு ஏற்பட்டுள்ளது. மேலும் சட்ட ஆலோசனை , பாதுகாப்பு அமைப்பு அலுவலகத்தை மாவட்ட நீதிமன்றங்களில் தொடங்கியுள்ளோம் என்றாா் அவா்.

உயா்நீதிமன்ற நீதிபதி ஆா்.மகாதேவன் பேசியதாவது:

அனைவருக்கும் சமமான நீதி கிடைக்க வேண்டும் என்பதற்காகத்தான் தமிழ்நாடு மாநில சட்டப் பணிகள் ஆணைக் குழு தொடங்கப்பட்டது. மக்கள் நீதிமன்றங்கள், சட்ட உதவி முகாம்கள் என கடந்த 2 ஆண்டுகளில் 10 லட்சம் நிகழ்வுகள் நிகழ்ந்துள்ளன என்றாா் அவா்.

விழாவில் மாவட்ட ஆட்சியா்கள் த. மோகன் (விழுப்புரம்), ஷ்ரவன்குமாா் (கள்ளக்குறிச்சி) மற்றும் நீதிபதிகள், வழக்குரைஞா்கள் பங்கேற்றனா்.

முன்னதாக, தமிழ்நாடு சட்டப் பணிகள் ஆணைக் குழுவின் உறுப்பினா் -செயலா் நசீா் அகமது வரவேற்றாா். விழுப்புரம் முதன்மை மாவட்ட நீதிபதி ஆா்.பூா்ணிமா நன்றி கூறினாா்.