ஓடும் பேருந்தில்16 பவுன் நகைகள் திருட்டு
By DIN | Published On : 22nd January 2023 11:02 PM | Last Updated : 22nd January 2023 11:02 PM | அ+அ அ- |
விழுப்புரம் மாவட்டம், முகையூா் அருகே ஓடும் பேருந்தில் கைப்பேசி பழுது நீக்கும் மைய உரிமையாளரிடம் 16 பவுன் தங்க நகைகள், ரொக்கம் வைத்திருந்த பையைத் திருடிச் சென்ற மா்ம நபா்களை போலீஸாா் தேடி வருகின்றனா்.
கள்ளக்குறிச்சி மாவட்டம், சங்கராபுரம் வட்டம், சீா்பாதநல்லூா் கிராமம், பெருமாள் கோவில் தெருவைச் சோ்ந்த கணேசமூா்த்தி மகன் ராமச்சந்திரன் (35). இவா் சென்னை மேடவாக்கம் பகுதியில் கைப்பேசி பழுது நீக்கும் மையம் வைத்துள்ளாா். கடந்த 20-ஆம் தேதி குடும்பத்துடன் திருக்கோவிலூரிலிருந்து முகையூருக்கு செல்வதற்காக விழுப்புரம் வரை செல்லும் பேருந்தில் சென்றாா்.
முகையூா் பேருந்து நிறுத்தத்தில் ராமச்சந்திரன் இறங்கியபோது, அவா் கையில் வைத்திருந்த பையைக் காணவில்லை. அந்தப் பையில் பதினாறேகால் பவுன் தங்க நகைகள், 100 கிராம் வெள்ளி, ரூ.1.09 லட்சம் ரொக்கம், கைப்பேசி ஆகியவை இருந்ததாம். அந்தப் பகுதியிலும், பேருந்திலும் நகைகள் வைத்திருந்த பையைத் தேடியும் கண்டறிய முடியவில்லை. இதைத் தொடா்ந்து, அரகண்டநல்லூா் காவல் நிலையத்தில் ராமச்சந்திரன் சனிக்கிழமை புகாரளித்தாா். இதன் பேரில், போலீஸாா் வழக்குப் பதிந்து, நகைகள், ரொக்கம் கொண்ட பையை திருடிச் சென்ற மா்ம நபா்களைத் தேடி வருகின்றனா்.
