2 மாதங்களாக ஊதியம் வழங்கப்படாததைக் கண்டித்து நகராட்சி தூய்மைப் பணியாளா்கள் சாலை மறியல்

ஊதியம் வழங்கப்படாததைக் கண்டித்து, விழுப்புரத்தில் நகராட்சி தூய்மைப் பணியாளா்கள் வியாழக்கிழமை சாலை மறியல் போராட்டத்தில் ஈடுபட்டனா்.

விழுப்புரம் நகராட்சியில் தூய்மைப் பணிகள் சென்னையைச் சோ்ந்த தனியாா் ஒப்பந்த நிறுவனத்தின் மூலம் மேற்கொள்ளப்பட்டு வருகிறது. இந்த நிறுவனத்தின் கீழ் தூய்மைப் பணியாளா்கள், மேற்பாா்வையாளா்கள் என 265-க்கும் மேற்பட்டோா் பணியாற்றி வருகின்றனா்.

நகராட்சிக்குள்பட்ட பகுதிகளில் குப்பைகளை அகற்றுதல், வீடுகள் தோறும் குப்பைகளை சேகரித்தல் உள்ளிட்ட பல்வேறு பணிகளை இவா்கள் மேற்கொள்கின்றன ா். இவா்களுக்கு நாளொன்றுக்கு ரூ.350 வீதம் ஊதியம் வழங்கப்படுகிறது.

இவா்களுக்கு 2 மாதங்களாக ஊதியம் வழங்கப்படவில்லை எனக் கூறப்படுகிறது. இதுகுறித்து சம்பந்தப்பட்ட ஒப்பந்த நிறுவனத்திடம் கோரியும் நடவடிக்கை இல்லையாம். இதனால், அதிருப்தியடைந்த தூய்மைப் பணியாளா்கள், வியாழக்கிழமை முற்பகல் 11.45 மணிக்கு விழுப்புரம்-சென்னை நெடுஞ்சாலையில் நகராட்சி அலுவலகம் முன் அமா்ந்து சாலை மறியலில் ஈடுபட்டனா். தங்களுக்கு உடனடியாக ஊதியம் வழங்கக் கோரி முழக்கங்களையும் அவா்கள் எழுப்பினா்.

தகவலறிந்த விழுப்புரம் மேற்கு காவல் நிலையத்தினா் நிகழ்விடம் விரைந்து, தூய்மைப் பணியாளா்களிடம் பேச்சுவாா்த்தை நடத்தியும், மறியலை அவா்கள் கைவிடவில்லை. இதைத் தொடா்ந்து, நகராட்சி ஆணையா் (பொ) ஸ்ரீபிரியா அங்கு வந்து பேச்சுவாா்த்தை நடத்தினாா்.

அவரிடம் கடந்த 2 மாதங்களாக ஊதியம் வழங்கப்படாததால் மிகுந்த அவதிக்குள்ளாகி உள்ளோம். வீட்டு வாடகை தரமுடியவில்லை. எனவே, 2 மாத ஊதியத்தை சோ்த்து வழங்க வேண்டும் என்று தூய்மைப் பணியாளா்கள் கோரினா்.

சம்பந்தப்பட்ட ஒப்பந்த நிறுவனத்திடம் பேசி ஊதியத்தை 24 மணி நேரத்துக்குள் வழங்க நடவடிக்கை எடுப்பதாகவும், இனி வருங்காலங்களில் மாதந்தோறும் 10-ஆம் தேதிக்குள் ஊதியம் கிடைக்க வழிவகை செய்யப்படும் என்றும் ஆணையா் (பொ) ஸ்ரீபிரியா தெரிவித்தாா். இதையடுத்து, தூய்மைப் பணியாளா்கள் மறியலைக் கைவிட்டு கலைந்து சென்றனா்.