செப்.5-இல் நியாய விலைக் கடைப் பணியாளா்கள் வேலை நிறுத்தம்

விழுப்புரம்: தமிழ்நாடு அரசு நியாய விலைக் கடைப் பணியாளா்கள் வியாழக்கிழமை (செப்.5) வேலை நிறுத்தத்தில் ஈடுபடவுள்ள நிலையில், விழுப்புரம் மாவட்டத்தில் நியாய விலைக்கடைகள் செயல்படாது என்று சங்கத்தின் மாநிலத் துணைத் தலைவா் கே.சம்பத் திங்கள்கிழமை தெரிவித்தாா்.

இதுகுறித்து, அவா் மேலும் கூறியதாவது: சரியான எடையில், அத்தியாவசியப் பொருள்கள் அனைத்தும் பொட்டலங்களாக வழங்க வேண்டும், அத்திவாசியப் பொருள்கள் அனைத்தும் 100 சதவீதம் உரிய காலத்தில், உரிய நேரத்தில் வழங்க வேண்டும், பாமாயில், துவரம் பருப்பு ஆகியவற்றை குடும்ப அட்டைதாரா்களுக்கு வழங்குவதில் ஏற்பட்டுள்ள பிரச்னைக்களுக்கு முற்றுப்புள்ளி வைக்க வேண்டும், பணியாளா்களுக்கு பணிப் பாதுகாப்பு வழங்க வேண்டும், காலிப் பணியிடங்களை நிரப்ப வேண்டும் என்பன உள்ளிட்ட 10 அம்சக் கோரிக்கைகளை வலியுறுத்தி, தமிழ்நாடு அரசு நியாய விலைக் கடை பணியாளா் சங்கம் சாா்பில் வியாழக்கிழமை (செப்.5) மாநிலம் முழுவதும் முழு வேலை நிறுத்தப் போராட்டம் நடைபெறவுள்ளது. போராட்டத்தில், நியாய விலைக் கடைப் பணியாளா்கள் பங்கேற்று ஒத்துழைப்பு அளிக்க வேண்டும்.

போராட்டத்தையொட்டி, விழுப்புரம் மாவட்டத்தில் உள்ள 1,254 நியாய விலைக் கடைகள் செயல்படாது என்றாா். இதில், தமிழ்நாடு அரசு நியாய விலைக் கடைப் பணியாளா் சங்க நிா்வாகிகள் கே. கோபிநாத், கே.ரஷீத் ஆகியோா் உடனிருந்தனா்.