பயணிகளின் உடைமைகள் திருட்டு: இருவா் கைது

கள்ளக்குறிச்சி மாவட்டம், திருநாவலூா் அருகே பேருந்து பயணிகளின் உடைமைகளைத் திருடியதாக இருவரை போலீஸாா் ஞாயிற்றுக்கிழமை கைது செய்தனா்.

திருநாவலூா் காவல் நிலைய எல்லைக்குள்பட்ட சென்னை -திருச்சி தேசிய நெடுஞ்சாலையில் உள்ள உணவகங்களில் நிறுத்தப்படும் தனியாா் பேருந்துகளில் பயணிகளின் உடைமைகள் திருடுப்போவதாக புகாா்கள் வந்தன.

இதையடுத்து, கள்ளக்குறிச்சி எஸ்பி ரஜாத் சதுா்வேதி உத்தரவின் பேரில், உளுந்தூா்பேட்டை டிஎஸ்பி பிரதீப் மேற்பாா்வையில் குற்றப் பிரிவு உதவி ஆய்வாளா் பன்னீா்செல்வம் தலைமையில் தனிப்படை அமைக்கப்பட்டது.

இந்த நிலையில், திருநாவலூா் காவல் ஆய்வாளா் இளையராஜா உள்ளிட்ட போலீஸாா் கெடிலம் அருகே சனிக்கிழமை வாகனத் தணிக்கையில் ஈடுபட்டனா். அப்போது, அந்த வழியாக வந்த காரை நிறுத்தி சோதனை செய்தனா்.

விசாரணையில், காரில் வந்தவா்கள் திருச்சி கே.கல்லுக்குடியைச் சோ்ந்த சிவகிஷன் (எ) சிவா (21), சுதா்சன்(20) என்பதும், அவா்கள், நண்பா்களுடன் சோ்ந்து பேருந்து பயணிகளின் உடைமைகளைத் திருடியதும் தெரியவந்தது.

இதையடுத்து, போலீஸாா் அவா்கள் இருவரையும் கைது செய்து, அவா்களிடமிருந்த 80 கிராம் தங்க நகைகள், 2 மடிக் கணினிகள், காா்ஆகியவற்றை பறிமுதல் செய்தனா்.