உளுந்தூா்பேட்டை வட்டத்தில் வளா்ச்சித் திட்டப் பணிகள் ஆய்வு

கள்ளக்குறிச்சி மாவட்டம், உளுந்தூா்பேட்டை வட்டத்துக்குள்பட்ட பகுதிகளில் நடைபெற்று வரும் பல்வேறு வளா்ச்சித் திட்டப்பணிகளை ஆட்சியா் எம்.எஸ்.பிரசாந்த் புதன்கிழமை ஆய்வு செய்தாா்.

உளுந்தூா்பேட்டை ஒன்றியம், பிடாகம் கிராமத்தில் 15-ஆவது நிதிக்குழு மானியத் திட்டத்தின் கீழ் ரூ.9.69 லட்சத்தில் கிணறு அமைத்தல் பணி, பிடாகம் காவல் நிலையம் பின்பகுதியில் ரூ.22 லட்சத்தில் கட்டப்பட்டு வரும் புதிய நூலகக் கட்டுமானப் பணி, பிடாகம்-உள்கோட்டை கிராமத்தில் கலைஞரின் கனவு இல்லம் திட்டத்தின் கீழ் தலா ரூ.3.10 லட்சத்தில் கட்டப்பட்டு வரும் கான்கிரீட் வீடுகள் கட்டுமானப் பணி, கீழப்பாளையத்தில் மகாத்மா காந்தி தேசிய ஊரக வேலை உறுதியளிப்புத் திட்டத்தின் கீழ் ரூ.12.25 லட்சத்தில் புதிய கிணறு அமைத்தல் ஆகியவற்றை பாா்வையிட்ட ஆட்சியா் பிரசாந்த், அந்தப் பணிகளை விரைந்து முடிக்க அறிவுறுத்தினாா்.

இதைத் தொடா்ந்து மூலசமுத்திரம்கிராமத்தில் ரூ.60 ஆயிரம் மதிப்பீட்டில் ஊரக விளையாட்டு மைதானம் அமைத்தல் பணியைப் பாா்வையிட்ட ஆட்சியா், உளுந்தூா்பேட்டை ஒன்றியக்குழு அலுவலக வளாகத்திலுள்ள அரசு சிமென்ட் கிடங்கைப் பாா்வையிட்டு, இருப்பு விவரம் உள்ளிட்டவை குறித்து கேட்டறிந்தாா்.

அரசு வளா்ச்சித் திட்டங்களே பொதுமக்களின் வளா்ச்சிக்கு அடித்தளமாக அமைந்துள்ளது. எனவே கள்ளக்குறிச்சி மாவட்டத்தில் அரசின் வளா்ச்சித் திட்டங்களை செயல்படுத்துவதில் அரசு அலுவலா்கள் அா்ப்பணிப்புடன் பணியாற்ற வேண்டும் என்றாா் ஆட்சியா் பிரசாந்த்.

இந்த ஆய்வின் போது ஊரக வளா்ச்சித் துறை அலுவலா்கள், வட்டார வளா்ச்சி அலுவலா்கள் உள்ளிட்டோா் உடனிருந்தனா்.