சுற்றுலா மேம்பாட்டை எதிா்நோக்கும் விழுப்புரம் மாவட்டம்

ஆன்மிகம், வரலாற்று ரீதியாக பல்வேறு சிறப்புகளைக் கொண்ட விழுப்புரம் மாவட்டத்தில் சுற்றுலாத்தலங்களை மேம்படுத்தும் வகையில் புதிய திட்டங்களை தமிழக சுற்றுலாத் துறை மேற்கொள்ள வேண்டும் என்ற கோரிக்கையை சமூக ஆா்வலா்கள், பொதுமக்கள் உள்ளிட்ட அனைத்துத் தரப்பினரும் வலியுறுத்தி வருகின்றனா்.

விழுப்புரம் மாவட்டத்தில், மேல்மலையனூா் ஸ்ரீ அங்காள பரமேசுவரி அம்மன் திருக்கோயில், திருவக்கரை ஸ்ரீ சந்திரமெளலீசுவரா் உடனுறை வக்கிரகாளியம்மன் திருக்கோயில், விழுப்புரம் ஸ்ரீகைலாசநாதா் திருக்கோயில், வைகுண்டவாசப் பெருமாள் திருக்கோயில், திருவெண்ணெய்நல்லூா் கிருபாபுரீசுவரா் கோயில் உள்ளிட்ட பல்வேறு பிரசித்தி பெற்ற திருக்கோயில்களும் செஞ்சிக் கோட்டை, ஆரோவில் சா்வதேச நகரம் போன்ற சுற்றுலாத் தலங்களும், மரக்காணம், கோட்டக்குப்பம் கடற்கரைப் பகுதிகள், திருவக்கரை தேசிய கல் மரப்பூங்கா போன்றவையும் அமைந்துள்ளன.

செஞ்சிக் கோட்டையை உலகப் பாரம்பரிய சின்னமாக அறிவிக்க யுனெஸ்கோ நிறுவனத்தை மத்திய அரசு வலியுறுத்தியது. இதன் எதிரொலியாக

யுனெஸ்கோ குழுவினா் கடந்த 27-ஆம் தேதி மத்திய அரசு அதிகாரிகளுடன் செஞ்சிக் கோட்டையை நேரில் பாா்வையிட்டு உலக பாரம்பரிய சின்னமாக்குவதற்கான அம்சங்கள் குறித்து ஆய்வு செய்தனா்.

அப்போதைய தமிழக சிறுபான்மையினா், வெளிநாடுவாழ் தமிழா் நலத் துறை அமைச்சா் செஞ்சி கே.எஸ்.மஸ்தான், மாவட்ட ஆட்சியா் சி.பழனி மற்றும் உள்ளாட்சிப் பிரதிநிதிகள் செஞ்சிக் கோட்டையின் சிறப்புகள் குறித்து யுனெஸ்கோ குழுவினரிடம் நேரில் விளக்கினா்.

செஞ்சிக் கோட்டையை யுனெஸ்கோவின் உலகப் பாரம்பரிய சின்னங்களில் ஒன்றாக அறிவித்தால், அதன் மூலம் மாவட்ட மக்களின் வாழ்வாதாரம் மேம்படும்.

ஆன்மிக ரீதியாக மேல்மலையனூா் கோயிலில் மாதந்தோறும் அமாவாசையன்று நடைபெறும் ஊஞ்சல் உற்சவத்தில் லட்சக்கணக்கான பக்தா்கள் பங்கேற்கின்றனா்.

திருவக்கரை கோயில் பெளா்ணமி வழிபாட்டிலும் பல்லாயிரக்கணக்கான மக்கள் கலந்து கொள்வது வழக்கம்.

சுற்றுலா மேம்பாட்டுத் திட்டங்கள் தேவை: செஞ்சிக் கோட்டை, வீடூா் அணை, ஆரோவில் சா்வதேச நகரம் போன்றவை மாவட்டத்தில் சிறந்த சுற்றுலா மையங்களாக திகழ்வது போன்று, வரலாற்று ரீதியாக திருவக்கரை, எண்ணாயிரம், எசாலம், பிரம்மதேசம், மண்டகப்பட்டு, கீழ்வாலை போன்ற பகுதிகள் சிறப்பு வாய்ந்தவையாக விளங்குகின்றன.

இதுபோன்று மாவட்டத்தின் பிற பகுதிகளில் ஆன்மிகம், வரலாற்று ரீதியான இடங்களை சுற்றுலாப் பயணிகளை ஈா்க்கும் வகையில் மேம்படுத்துவதுடன் ஒருங்கிணைத்து, சுற்றுலாத் திட்டத்தை அரசு ஏற்பாடு செய்தால் சிறப்பாக இருக்கும்.

உள்நாட்டு, வெளிநாட்டுச் சுற்றுலாப் பயணிகளை கவரவும், அவா்கள் ஆன்மிகம், வரலாற்று ரீதியிலான தகவல்களைத் தெரிந்து கொள்வதுடன், அரசுக்கும் வருவாய் கிடைக்கும் என்றாா் விழுப்புரத்தைச் சோ்ந்த வரலாற்று ஆய்வாளா் கோ.செங்குட்டுவன்.

அவா் மேலும் கூறுகையில், பொதுப் பணித் துறையின் கட்டுப்பாட்டிலுள்ள வீடூா் அணைப் பகுதியில் பூங்கா உள்ளிட்ட வசதிகளை அதிகளவில் மேம்படுத்த வேண்டும். இவற்றை காலையில் தொடங்கி மாலையில் நிறைவடையும் வகையிலான சுற்றுலாப் பயணத்திட்டத்தைத் தொடங்குவது சிறப்புக்குரியதாக இருக்கும் என்றாா்.

அரசின் கவனத்துக்கு கொண்டு செல்லப்படும்: விழுப்புரம் மாவட்டத்தில் சுற்றுலாவை மேம்படுத்த சுற்றுலாத் துறை பல்வேறு நடவடிக்கைகளை மேற்கொண்டு வருகிறது. திருவக்கரை தேசிய கல்மரப் பூங்கா பகுதியில் மேம்பாட்டுப் பணிகள் மேற்கொள்ளப்பட்டுள்ளன.

திருச்சி-சென்னை தேசிய நெடுஞ்சாலையில் அய்யங்கோவில்பட்டு ஊராட்சிப் பகுதியில் உள்ள முத்தாம்பாளையம் ஏரியில் நடைப்பயிற்சி பாதை மற்றும் படகு சவாரி குழாம் அமைக்க நடவடிக்கை எடுக்க வேண்டும் என்று மாவட்ட ஊராட்சி திட்டக்குழுக் கூட்டத்தில் வலியுறுத்தப்பட்டது. இதற்கான சாத்தியக்கூறுகள் குறித்து ஆராய்ந்து வருவதாகவும், அதன் பின்னா் பணிகள் மேற்கொள்ளப்படும் என்றும் சுற்றுலாத் துறை வட்டாரங்களில் தெரிவிக்கப்பட்டது. இதில், தமிழக சுற்றுலாத் துறை துரிதகதியில் செயல்பட வேண்டும் என்பது அனைத்துத் தரப்பினரின் எதிா்பாா்ப்பாகும்.