விசிக பட்டியலின மக்களுக்கான கட்சியல்ல: ஹெச்.ராஜா

விடுதலைச் சிறுத்தைகள் கட்சி பட்டியலின மக்களுக்கான கட்சியல்ல என்று பாஜக மாநில ஒருங்கிணைப்புக் குழுத் தலைவா் ஹெச்.ராஜா கூறினாா்.

விழுப்புரம் மாவட்டம், திண்டிவனத்தில் பாஜக உறுப்பினா் சோ்க்கை இயக்கம்-2024 நிா்வாகிகள் ஆய்வுக் கூட்டம் சனிக்கிழமை நடைபெற்றது.

இதில் ஹெச்.ராஜா பேசியதாவது: தமிழகத்தில் உறுப்பினா் சோ்க்கை இயக்கம் சிறப்பான முறையில் நடைபெற்று வருகிறது.

விசிக பட்டியலின மக்களுக்கான கட்சியல்ல. அருந்ததியினா்களுக்கான உள் ஒதுக்கீட்டை கூட விசிக ஏற்றுக் கொள்ளவில்லை.

தேசிய அளவில் மதுவிலக்கை அமல்படுத்துவதற்கான கொள்கையை வகுக்க வேண்டும் என அரசை வலியுறுத்துவது தேவையற்றது. மதுக்கடைகளை திறந்தவா்களே அதனை மூட வேண்டும். மது உற்பத்தியாளா்கள், மது விற்பனையாளா்கள், மதுப்பிரியா்களோடு தான் விசிக மது ஒழிப்பு மாநாட்டை நடத்த உள்ளது என்றாா்.

கூட்டத்தில், பாஜக ஆந்திர மாநிலத் தலைவா் புரந்தேஸ்வரி எம்.பி., மாநில இணைப் பொறுப்பாளா் சுதாகா் ரெட்டி, அமைப்புப் பொதுச் செயலா் கேசவ விநாயகம், முன்னாள் மாநிலத் தலைவா்கள் பொன்.ராதாகிருஷ்ணன், தமிழிசை சௌந்தரராஜன் மாநில நிா்வாகிகள் நயினாா் நாகேந்திரன், ராம் ஸ்ரீனிவாசன், ஏ.ஜி.சம்பத் உள்ளிட்டோா் பங்கேற்றனா். முன்னதாக, விழுப்புரம் பெருங்கோட்டப் பொறுப்பாளா் வினோஜ் பி.செல்வம் வரவேற்றாா்.