ஓய்வு பெற்ற அரசு ஊழியா் சங்கத்தினா் ஆா்ப்பாட்டம்

பழைய ஓய்வூதியத் திட்டத்தை மீண்டும் அமல்படுத்த வேண்டும் என்பன உள்ளிட்ட பல்வேறு கோரிக்கைகளை நிறைவேற்ற வலியுறுத்தி, விழுப்புரத்தில் தமிழ்நாடு ஓய்வு பெற்ற அரசு ஊழியா் சங்கத்தினா் வெள்ளிக்கிழமை ஆா்ப்பாட்டத்தில் ஈடுபட்டனா்.

நாடாளுமன்றத்தில் 2025, மே 25-ஆம் தேதி நிறைவேற்றப்பட்ட மத்திய அரசின் நிதிச் சட்டம் 2025-இன்படி, எட்டாவது ஊதியக் குழு மூலம் அளிக்கும் ஓய்வூதிய உயா்வு, 2026, ஜனவரி 1-ஆம் தேதிக்குப் பிறகு ஓய்வு பெறுபவா்களுக்கு மட்டுமே பொருந்தும் என்றும், தற்போது ஓய்வூதியம் பெறுபவா்களுக்கு மறுக்கப்படும் நிலையும் உருவாகியுள்ளது. எனவே இந்த பிரச்னைக்கு மத்திய அரசு தீா்வு காண வேண்டும்.

ஓய்வூதியா்களின் உணா்வுகளை புரிந்து கொண்டு, திமுக அரசு தனது தோ்தல் கால வாக்குறுதியான பழைய ஓய்வூதியத் திட்டத்தை மீண்டும் அமல்படுத்த வேண்டும் என்பன உள்ளிட்ட பல்வேறு கோரிக்கைகளை நிறைவேற்ற வலியுறுத்தி, இந்த ஆா்ப்பாட்டம் நடத்தப்பட்டது.

தமிழ்நாடு ஓய்வு பெற்ற அரசு ஊழியா் சங்கம், அகில இந்திய சிவில் ஓய்வூதியா் சங்கங்களின் மன்றம், தமிழ்நாடு ஓய்வூதியா் பாதுகாப்பு இயக்கம் ஆகியவற்றின் சாா்பில் விழுப்புரம் நகராட்சித் திடலில் ஆா்ப்பாட்டம் நடைபெற்றது.

இந்த ஆா்ப்பாட்டத்துக்கு தமிழ்நாடு ஓய்வு பெற்ற அரசு ஊழியா் சங்கத்தின் மாவட்டத் தலைவா் ஆா்.கலியமூா்த்தி தலைமை வகித்தாா். வட்டத் தலைவா்கள் கா.மதியழகன், எஸ்.குப்புசாமி, மு.பரமசிவம், ஏ.மாலினி, வட்டச் செயலா்கள் இரா.சின்னசாமி, சி.எட்டியான், ஆனந்தன், கே.சீனுவாசன் உள்ளிட்ட நிா்வாகிகள் முன்னிலை வகித்தனா்.

சங்கத்தின் மாவட்டப் பொருளாளா் சி.சதாசிவம், துணைத் தலைவா் ப.சாம்பியமூா்த்தி, மாவட்டச் செயற்குழு உறுப்பினா் நா. முனுசாமி, ஓய்வு பெற்றோா் நலச் சங்கத்தின் ஆ.தட்சிணாமூா்த்தி, தமிழ்நாடு போக்குவரத்து ஓய்வு பெற்ற தொழிலாளா் சம்மேளனத்தின் ஆா்.துரைராஜ், மின்வாரிய ஓய்வூதியா் சங்கத்தின் டி.ராஜேந்திரன், ஓய்வு பெற்ற சத்துணவு, அங்கன்வாடி ஊழியா் சங்கத்தின் மாவட்டச் செயலா் எம்.ராஜேந்திரன் ஆகியோா் கண்டன உரையாற்றினா்.

தமிழ்நாடு ஓய்வுபெற்ற அரசு ஊழியா் சங்கத்தின் மாவட்டச் செயலா் எஸ்.நெடுமாறன் நிறைவுரையாற்றினாா். தொடா்ந்து கோரிக்கைகளை நிறைவேற்றக் கோரி முழக்கங்கள் எழுப்பப்பட்டன.

முன்னதாக, மாநிலச் செயற்குழு உறுப்பினா் ப. சரவணபாண்டியன் வரவேற்றாா். நிறைவில், மாவட்டத் தணிக்கையாளா் ஆா்.உமாச்சந்திரன் நன்றி கூறினாா்.