அரசுப் பேருந்தில் பயணித்தவா் உடல்நலக் குறைவால் உயிரிழப்பு

கள்ளக்குறிச்சி மாவட்டம், உளுந்தூா்பேட்டை அருகே அரசுப் பேருந்தில் பயணித்த மதுரையைச் சோ்ந்தவா் உடல்நலக் குறைவு ஏற்பட்டு ஞாயிற்றுக்கிழமை உயிரிழந்தாா்.

மதுரை வண்டியூா், சதாசிவம் நகரைச் சோ்ந்தவா் சண்முகவேல் (48). மனை வணிகம் சாா்ந்த தொழிலில் ஈடுபட்டு வந்தாா். இவா், சனிக்கிழமை சென்னையிலிருந்து மதுரைக்கு அரசுப் பேருந்தில் சென்றுகொண்டிருந்தாா். கள்ளக்குறிச்சி மாவட்டம், உளுந்தூா்பேட்டை காவல் சரகத்துக்குள்பட்ட செங்குறிச்சி அருகே பேருந்து சென்றபோது சண்முகவேலுக்கு நெஞ்சு வலி ஏற்பட்டதாம்.

இதையடுத்து, 108 அவசர ஊா்தி மூலம் உளுந்தூா்பேட்டை அரசு மருத்துவமனைக்கு சிகிச்சைக்கு கொண்டு செல்லும் வழியில் சண்முகவேல் உயிரிழந்தாா். இதுகுறித்த புகாரின்பேரில், உளுந்தூா்பேட்டை போலீஸாா் வழக்குப் பதிந்து விசாரித்து வருகின்றனா்.