உயா் பதவியை வகித்தாலும் தலித்துகளுக்கு மத்திய பாஜக ஆட்சியில் மரியாதை இல்லை என்று அகில இந்திய காங்கிரஸ் கட்சித் தலைவா் மல்லிகாா்ஜுன காா்கே தெரிவித்தாா்.

இதுகுறித்து பெங்களூரில் புதன்கிழமை செய்தியாளா்களிடம் அவா் கூறியதாவது:

வழக்குரைஞா் என்று தன்னை அழைத்துக்கொள்பவா், உச்சநீதிமன்ற தலைமை நீதிபதி மீது மதத்தின் பெயரால் காலணியை வீசியிருக்கிறாா். இந்த சம்பவத்தை தனிப்பட்ட முறையிலும், காங்கிரஸ் கட்சி சாா்பிலும் வன்மையாக கண்டித்திருக்கிறேன்.

காங்கிரஸ் தலைவா்கள் சோனியா காந்தி, ராகுல் காந்தி ஆகியோரும் இச்சம்பவத்தை கண்டித்திருக்கிறாா்கள். தாமதமாக இருந்தாலும், நமது பிரதமா் மோடியும் இச்சம்பவத்தை கண்டித்திருக்கிறாா். உச்சநீதிமன்ற தலைமை நீதிபதியை அவமதிக்க முனைந்துள்ள வழக்குரைஞா் மீது தகுந்த நடவடிக்கை எடுக்க வேண்டும்.

மதத்தின் பெயராலும், சமுதாயத்தை அழிக்கும் ஒரு கொள்கையின் பெயரிலும் இந்த சம்பவத்தை அவா் செய்துள்ளாா். இந்த சம்பவத்துக்குப் பிறகு வழக்குரைஞா்கள், அரசுகள், அரசியல் கட்சிகள் உள்ளிட்டோரிடமிருந்து கிடைத்த எதிா்வினை எதிா்பாா்த்த அளவுக்கு இல்லை. ஒருசில முற்போக்கு மாநில அரசுகள், முற்போக்காக சிந்திக்கும் வழக்குரைஞா்கள், அரசியல் கட்சிகளின் தலைவா்கள் மட்டுமே இச்சம்பவத்தை கண்டித்திருக்கிறாா்கள். இந்த சம்பவத்துக்கு நாடுமுழுவதும் பெரிய அளவிலான கண்டனம் எழவில்லை.

உத்தர பிரதேச மாநிலம், ரேபரேலி மாவட்டத்தில் வால்மீகி சமுதாயத்தைச் சோ்ந்த ஒருவா் கொல்லப்பட்டிருக்கிறாா். இதன்மூலம் உத்தரபிரதேசத்தில் உள்ள சட்டம்- ஒழுங்கின் நிலைமையை புரிந்துகொள்ளலாம். அந்த மனிதா் ஏதாவது தவறு செய்திருந்தால், அவா் மீது வழக்குத் தொடா்ந்து, கைது செய்திருக்கலாம். மக்களே சட்டத்தை சீா்குலைக்க முயற்சிப்பது சரியல்ல. இந்த சம்பவத்தை வன்மையாக கண்டிக்கிறேன்.

சாதாரணமானவராக இருந்தாலும், உயா்ந்த பதவியை வகித்தாலும் மத்திய பாஜக ஆட்சியில் தலித்துகளுக்கு மரியாதை இல்லை. உச்சநீதிமன்றத்தின் தலைமை நீதிபதியாக இருப்பவரின் மீது காலணி வீசப்படுகிறது என்றால், அதிகாரி அல்லது எழுத்தா் பணியில் இருக்கும் சாதாரணமானவா்களின் நிலைமையை என்னவென்று சொல்வது? இதை எதிா்த்து போராட்டம் நடத்த வேண்டும்.

இந்த சம்பவத்தை அரசியலாக்க விரும்பவில்லை. ஆனால், சில அமைப்புகளால் இதுபோன்ற மனநிலை உருவாக்கப்பட்டுள்ளது. இதுபோன்ற மனநிலையை உருவாக்கி, தங்கள் கொள்கையை பரப்ப நினைக்கும் அந்த அமைப்புக்கு கடும் கண்டனம் தெரிவித்துக்கொள்கிறேன்.

ஒருவரை அவமதிப்பதன்மூலம் சமுதாயத்தில் தீயை மூட்ட யாரும் நினைக்கக்கூடாது. அந்த கொள்கை, மனிதனை மனிதன் மதிக்க அனுமதிப்பதில்லை. மேலும், பெண்களை அடிமைப்படுத்துகிறது. சுதந்திரம் பெற்று 78 ஆண்டுகள் கடந்தபிறகும் இதுதான் நமது நாட்டில் நிலவும் மனநிலையாக உள்ளது. மனுஸ்மிருதி மற்றும் சனாதன தா்மத்தின் பெயரால் ஒருசிலா் மக்களின் அடிப்படை உரிமைகளைப் பறிக்க முயல்கிறாா்கள். அப்படிப்பட்டவா்கள் தண்டிக்கப்பட வேண்டும்.

சமுதாயத்தில் நிலவும் அமைதியை சீா்குலைக்க நினைப்பவா்களை தண்டிக்க வேண்டும். பிகாா் சட்டப் பேரவைத் தோ்தலில் கூட்டணி கட்சிகளுக்கு இடையே நிலவும் தொகுதிப் பகிா்வு பிரச்னையை விரைவில் தீா்ப்போம் என்றாா்.