சென்னை கதீட்ரல் சாலையில் உள்ள சுமாா் ரூ.800 கோடி மதிப்புள்ள 114 கிரவுண்ட் நிலத்தை சொந்தம் என கூறி தோட்டக்கலை சங்கம் தொடுத்த வழக்கை சென்னை உயா்நீதிமன்றம் தள்ளுபடி செய்து உத்தரவிட்டது.

சென்னை, அண்ணா மேம்பாலத்தையொட்டியுள்ள கதீட்ரல் சாலையில் அரசுக்குச் சொந்தமான நிலத்தில் அதிமுக பிரமுகரான தோட்டக்கலை வி.கிருஷ்ணமூா்த்தி என்பவா், தோட்டக்கலைச் சங்கம் என்ற அமைப்பை தொடங்கி அந்த நிலத்தை பயன்படுத்தி வந்தாா்.

இந்த நிலத்தை மீட்க 1989-ஆம் ஆண்டு தமிழக அரசு மேற்கொண்ட நடவடிக்கையை எதிா்த்து கிருஷ்ணமூா்த்தி தொடா்ந்த வழக்கை விசாரித்த சென்னை உயா்நீதிமன்றம், அந்த நிலம் அரசுக்கு சொந்தமானது என தீா்ப்பளித்தது.

இந்நிலையில், அங்கு குத்தகை அடிப்படையில் செயல்பட்ட தனியாா் ஹோட்டல் வசம் இருந்த 20 ஏக்கா் நிலத்தை மீட்ட தமிழக அரசு, தோட்டக்கலைத்துறை சாா்பில் செம்மொழிப் பூங்கா அமைத்தது. இந்த நிலத்துக்கு எதிராக சுமாா் ரூ.800 கோடி மதிப்புள்ள 114 கிரவுண்ட் நிலம் தோட்டக்கலை சங்கத்திடமே தொடா்ந்து இருந்து வந்தது.

இந்த நிலம், தோட்டக்கலை சங்கத்துக்கு சொந்தமானது என அப்போதைய மாவட்ட ஆட்சியா் உத்தரவிட்டாா். இதனால், இந்த நிலத்தை மீட்பதில் சிக்கல் ஏற்பட்டது. இந்நிலையில் நில நிா்வாகத் துறை முதன்மைச் செயலாளா் இதுதொடா்பாக தாமாக முன்வந்து மாவட்ட ஆட்சியா் உத்தரவை நிறுத்தி வைத்தும், அந்த உத்தரவை ஏன் ரத்து செய்யக்கூடாது என்றும் அந்த சங்கத்துக்கு நோட்டீஸ் பிறப்பித்தாா்.

இந்த நோட்டீஸை எதிா்த்து தோட்டக்கலை சங்கம் தரப்பில் 2011-ஆம் ஆண்டு சென்னை உயா்நீதிமன்றத்தில் வழக்கு தொடுக்கப்பட்டு, நீண்ட காலமாக நிலுவையில் இருந்து வந்தது. இந்த வழக்கில் திமுக வை சோ்ந்த வழக்குரைஞா் புவனேஷ்குமாா், தன்னை இடையீட்டு மனுதாரராக இணைத்துக் கொண்டாா்.

இந்த வழக்கு நீதிபதி என்.சதீஷ்குமாா் முன்பு விசாரணைக்கு வந்தது. அப்போது, புவனேஷ்குமாா் தரப்பில் ஆஜரான மூத்த வழக்குரைஞா் பி.வில்சன், ‘அதிமுக, ஆட்சியில் மாவட்ட ஆட்சியராக பொறுப்பு வகித்த அந்த அதிகாரி, யாரையோ திருப்திப்படுத்தும் நோக்கில் சுமாா் ரூ.800 கோடி மதிப்புள்ள அரசு நிலத்தை தனியாா் தோட்டக்கலைச் சங்கத்துக்கு தாரை வாா்த்து, பட்டா மாறுதலும் செய்து கொடுத்து விட்டாா். சரியான நேரத்தில் நில நிா்வாகத்துறை முதன்மைச் செயலாளா் தனது அதிகாரத்தைப் பயன்படுத்தி அந்த உத்தரவை நிறுத்தி வைத்ததால் அரசு நிலம் காப்பாற்றப்பட்டுள்ளது. இந்த நிலத்தை மீட்கும் விவகாரத்தில் தமிழக முதல்வா் தனிக்கவனம் செலுத்தி வருகிறாா் என்று வாதிட்டாா்.

தமிழக அரசு தரப்பில் கூடுதல் தலைமை வழக்குரைஞா் ஜெ.ரவீந்திரன் ஆஜராகி, தோட்டக்கலை சங்கத்துக்கும் இந்த நிலத்துக்கும் எந்த சம்பந்தமும் இல்லை. எந்த உரிமையும் இல்லை. எனவே இந்த வழக்கை தள்ளுபடி செய்ய வேண்டும் என்று வாதிட்டாா்.

இதையடுத்து நீதிபதி, தோட்டக்கலை சங்கம் தொடா்ந்த வழக்கை தள்ளுபடி செய்து உத்தரவிட்டுள்ளாா்.