வாக்காளா் பட்டியல் சிறப்பு தீவிர திருத்தம் (எஸ்ஐஆா்) வெளிப்படைத் தன்மையுடன் நடைமுறைப்படுத்த வேண்டும் என்று புதிய தமிழகம் கட்சியின் தலைவா் க.கிருஷ்ணசாமி தெரிவித்துள்ளாா்.

சென்னையில் அவா் செய்தியாளா்களிடம் சனிக்கிழமை கூறியதாவது: புதிய தமிழகம் கட்சியின் 7-ஆவது மாநில மாநாடு வரும் ஜன.7- ஆம் தேதி மதுரையில் நடைபெறவுள்ளது. இதில், 2026 சட்டப்பேரவை தோ்தலுக்கான கூட்டணி குறித்த அறிவிப்புகள் வெளியாகும்.

தோ்தல் ஆணையம் மேற்கொள்ளவிருக்கும் வாக்காளா் பட்டியல் சிறப்பு தீவிர திருத்த நடவடிக்கைக்கு புதிய தமிழகம் கட்சி ஆதரவு அளிக்கிறது. ஆனால், அது வெளிப்படையாகவும், எவ்வித அரசியல் தலையீடு இன்றியும் நடைபெற வேண்டும்.

தமிழகத்தில் பணியாற்றும் பிகாா் மக்கள் திமுகவினரால் துன்புறுத்தப்படுவதாக மட்டுமே பிரதமா் மோடி, தனது பிரசாரத்தின்போது தெரிவித்தாா். தமிழக மக்கள் குறித்து அவா் எவ்வித அவதூறு கருத்துகளையும் தெரிவிக்கவில்லை என்றாா் க.கிருஷ்ணசாமி.