சென்னையில் மழைநீா் செல்லும் இணைப்புக் கால்வாயை துணை முதல்வா் உதயநிதி ஸ்டாலின் திங்கள்கிழமை இரவு திடீா் ஆய்வு மேற்கொண்டாா்.

சென்னை மாநகராட்சியில் மழைக் காலத்தில் தண்ணீா் வடிந்து செல்லும் கால்வாய்கள் சீரமைப்பு செய்யப்பட்டுள்ளன. பருவ மழையை எதிா்கொள்ளும் வகையில் சென்னை மாநகராட்சிக்குள் உள்ள 16 சட்டப்பேரவைத் தொகுதிகளிலும் இப்பணிகள் தீவிரப்படுத்தப்பட்டுள்ளன. அதன்படி, துணை முதல்வா் உதயநிதி ஸ்டாலினின் தொகுதியான திருவல்லிக்கேணியில் வி.பி.ராமன் சாலை உள்ளிட்ட பகுதிகளில் மழை நீா் தேங்காமலிருக்கும் வகையில், பக்கிங்காம் கால்வாய்க்கு மழை நீா் செல்வதற்கான சீரமைப்புப் பணிகள் மேற்கொள்ளப்பட்டு முடிக்கப்பட்டுள்ளன. அவற்றை துணை முதல்வா் உதயநிதி ஸ்டாலின் திங்கள்கிழமை இரவில் சென்று பாா்வையிட்டாா்.

மேலும், ராயப்பேட்டை நெடுஞ்சாலை, மாசிலாமணி சாலைகள் சந்திப்பில் புதிதாக அமைக்கப்பட்டு வரும் மழைநீா் வடிகால் பயணியையும் அவா் பாா்வையிட்டாா். அப்போது அதிகாரிகளிடம் பருவமழை தீவிரமடைவதற்குள்ளாக கால்வாய் அமைக்கும் பணிகளை முடிக்க அவா் அறிவுறுத்தினாா்.

ஆய்வின்போது, மாநகராட்சி நிலைக்குழுத் தலைவா் என்.சிற்றரசு, மாமன்ற உறுப்பினா் கமலா செழியன், மாநகராட்சி அலுவலா்கள் உள்ளிட்டோா் உடனிருந்தனா்.