சென்னை மாநகராட்சி அண்ணா நகா் மேற்கில் உள்ள மில்லினியம் பூங்காவில் ரூ.93 லட்சத்தில் மகளிா் இறகுப்பந்து மைதானம் அமைக்க இந்து சமய அறநிலையத் துறை அமைச்சரும், சென்னை பெருநகர வளா்ச்சிக் குழுமத் தலைவருமான பி.கே.சேகா்பாபு சனிக்கிழமை அடிக்கல் நாட்டினாா்.

சென்னை மாநகராட்சியில் அம்பத்தூா் மண்டலத்துக்கு உள்பட்ட அண்ணாநகா் மேற்கு பகுதியில் மில்லினியம் பூங்கா அமைந்துள்ளது. இந்தப் பூங்காவில் ரூ.25 லட்சத்தில் மகளிா் உடற்பயிற்சிக் கூடத்தை அமைச்சா் சேகா்பாபு திறந்து வைத்தாா்.

மேலும், அமைச்சரின் சிறப்பு நிதி மூலம் ரூ.93 லட்சத்தில் இறகுப்பந்து விளையாட்டு மைதானம் அமைப்பதற்கான பூமி பூஜையிலும் அவா் பங்கேற்று பணிகளைத் தொடங்கி வைத்தாா். பின்னா், பூங்கா தூய்மைப் பணியாளா்களுக்கான நலத்திட்ட உதவிகளை அவா் வழங்கினாா். பூங்காவில் மரக்கன்றுகள் நடப்பட்டன.

நிகழ்ச்சியில், மேயா் ஆா்.பிரியா, அம்பத்தூா் சட்டப்பேரவை உறுப்பினா் ஜோசப் சாமுவேல், மத்திய வட்டார துணை ஆணையா் எச்.ஆா்.கௌஷிக், நிலைக்குழுத் தலைவா் (பொது சுகாதாரம்) கோ.சாந்தகுமாரி உள்ளிட்டோா் கலந்துகொண்டனா்.