திருவள்ளூர்

திருவள்ளூரில் 10 ஆண்டுகளாக மூடப்பட்டுள்ளகதா் கிராம தொழில் வாரியத் தொழிற்சாலை

DIN

திருவள்ளூரில் கதா் கிராமத் தொழில் வாரியம் சாா்பில் செயல்படும் மண் பாண்டம் மற்றும் பாா் சோப்பு உற்பத்தி தொழிற்சாலை, கடந்த 10 ஆண்டுகளாக மூடப்பட்டுள்ளது. முள்செடி மண்டி காணப்படும் இந்த மையத்தை மீண்டும் செயல்பாட்டுக்கு கொண்டுவர வேண்டும் என இப்பகுதி மக்கள் கோரிக்கை விடுத்துள்ளனா்.

திருவள்ளூா் மாவட்டத்தில் கிராம பொருளாதாரத்தை மேம்படுத்தும் நோக்கத்தில் கதா் கிராம தொழில் வாரியம் சாா்பில் பல்வேறு தொழில்கள் தொடங்கப்பட்டு செயல்பட்டு வருகின்றன. இத்தொழில் வாரியம் மூலம் பல்வேறு திட்டங்கள் செயல்படுத்தப்பட்டன. திருவள்ளூா் அருகே உள்ள செவ்வாப்பேட்டை பகுதியில், கதா் கிராமத் தொழில் வாரியம் மூலம் தொழிற்சாலை நிறுவி மேற்கொள்ளப்பட்ட பல்வேறு பொருள்களின் உற்பத்தி தற்போது நின்று விட்டது.

இந்த தொழில் வாரியம் மூலம் கதா் துணிகள் உற்பத்திக்கு அடுத்த படியாக சுற்றுச்சூழலுக்கு பாதிப்பு இல்லாத மண் பாண்டம் மற்றும் ‘பாா்’ சோப்பு ஆகியவை தயாரிக்கும் தொழில் முக்கியமாக இருந்தது. இங்கு தயாா் செய்யப்படும் சோப்புகள் ரசாயனம் கலக்காமல் இருந்ததால் தீங்கு விளைவிக்காமல் இருந்தது.

இதனால் கதா் கிராமத் தொழில் வாரியம் மூலம் தயாரிக்கப்பட்ட சோப்புகள் மற்றும் மண்பாண்டம் ஆகியவற்றுக்கு பொதுமக்களிடம் நல்ல வரவேற்பு இருந்தது. தற்போது வளா்ந்து வரும் வா்த்தகப் போட்டி காரணமாக ‘பாா்’ சோப்பு என்பதே மிகவும் அரிதாகி விட்டதாக இத்தொழிலில் ஈடுபட்டிருந்த கதா் கிராமத் தொழில் துறையினா் தெரிவிக்கின்றனா்.

பக்க விளைவுகள் இல்லாத ரசாயனம் கலக்காத பொருள்களைப் பயன்படுத்தவே பொதுமக்கள் விரும்புகின்றனா். இதனால், கடந்த 25 ஆண்டுகளுக்கு முன்பு வரை சா்வோதய சங்கங்கள் மட்டுமின்றி, கதா் கிராமத் தொழில் வாரியமும் ‘பாா்’ சோப்புகளை உற்பத்தி செய்து, அவற்றை மளிகைக் கடைகளில் விற்க ஏற்பாடு செய்திருந்தது.

இயற்கையாகக் கிடைக்கும் மூலப்பொருள்களை கொண்டு பாா் சோப்பு தயாா் செய்யப்படுகிறது. அதனால் இந்த சோப்புகளை சந்தைப்படுத்த மாநில அரசு நடவடிக்கை எடுத்தால் ஆண்டுதோறும் நல்ல வருவாய் கிடைக்கும்.

நமது முன்னோா்களுக்கு கிடைத்த ஆரோக்கியம் இன்றைய நவீன சமையல் பாத்திரங்களில் கிடைப்பதில்லை.

கதா் கிராமத் தொழில் வாரியம் மூலம் செய்யப்பட்ட மண் பாண்டங்கள் மற்றும் சோப்பும் தற்போது கிடைப்பதில்லை. செவ்வாப்பேட்டை அருகில் இருந்த அந்த வாரியத்தின் தொழிற்சாலை தற்போது உற்பத்தி இல்லாமல், முள்செடிகள் மண்டிக் காணப்படுகிறது.

கிராமங்களில் தொழிலாளா்களுக்கு வேலைவாய்ப்பு கிடைக்கச் செய்யும் நோக்கத்தில் கதா் கிராமத் தொழில் மையம் ஏற்படுத்தப்பட்டது. எனவே செவ்வாப்பேட்டை தொழிற்சாலையை மீண்டும் தொடங்க வேண்டும் என்ற கோரிக்கை எழுந்துள்ளதாக சமூக ஆா்வலா்கள் தெரிவிக்கின்றனா்.

இது தொடா்பாக செவ்வாப்பேட்டை பகுதியைச் சோ்ந்த முன்னாள் தொழிலாளா் ராஜேந்திரன்(55) கூறியதாவது:

இந்தத் தொழிற்சாலையில் மண்பாண்டம், சோப் தயாா் செய்யும் தொழில் நடைபெற்று வந்தது. ஆனால், போதுமான ஆா்டா் கிடைக்காத காரணத்தால் கடந்த 10 ஆண்டுகளுக்கு முன்பு இத்தொழிற்சாலை மூடப்பட்டது. அதனால், இங்கு பணிபுரிந்த தொழிலாளா்கள் வேலைவாய்ப்பின்றி தவித்து வருகின்றனா். எனவே, இத்தொழில் மையத்தை மீண்டும் தொடங்க வேண்டும் என்றாா் அவா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

இன்று யோகம் யாருக்கு: தினப்பலன்கள்

பாஜக தோ்தல் அறிக்கையால் ஜனநாயகத்துக்கு பேராபத்து

அழகா் ஆற்றில் இறங்கும் வைபவம்: ஏப். 23-இல் உள்ளூா் விடுமுறை

சத்திய ஞான சபையில் இன்று ஜோதி தரிசனம்

சமயபுரம் மாரியம்மன் கோயிலில் இன்று சித்திரைத் தேரோட்டம்

SCROLL FOR NEXT