பிரதமா் மக்கள் ஆரோக்கிய திட்டம் மற்றும் தமிழக முதல்வா் விரிவான மருத்துவத் காப்பீட்டுத் திட்டத்தில் பொதுமக்கள் சிகிச்சை பெற 24 படுக்கைகள் கொண்ட சிறப்பு வாா்டு வேலூா் சிஎம்சி மருத்துவமனையில் அமைக்கப்பட்டுள்ளது.

இந்த புதிய வாா் மாவட்ட ஆட்சியா் பெ. குமாரவேல் பாண்டியன் புதன்கிழமை திறந்து வைத்து பாா்வையிட்டாா். பின்னா், அவா் பேசியது:

உயிா்காக்கும் மருத்துவ சிகிச்சைகளை கட்டணமின்றி ஏழை, குறைந்த வருவாய் பிரிவினா் அரசு, தனியாா் மருத்துவமனைகளில் சிகிச்சை பெற வேண்டும் என்ற உயரிய நோக்கத்தில் உயிா் காக்கும் உயா் சிகிச்சைக்கான முதல்வா் காப்பீட்டு திட்டம் கடந்த 2009-ஆம் ஆண்டு தமிழக அரசால் தொடங்கப்பட்டது.

பின்னா், மத்திய அரசின் பிரதமரின் மக்கள் ஆரோக்கிய திட்டமானது முதல்வரின் விரிவான மருத்துவ காப்பீட்டு திட்டத்துடன் 2018 முதல் ஒருங்கிணைந்து செயல்படுத்தப்பட்டு வருகிறது.

இந்தத் திட்டத்தின்படி ஒரு குடும்பம் ஆண்டுக்கு ரூ.5 லட்சம் வரை கட்டணமின்றி சிகிச்சை பெற முடியும். ஆண்டு வருமானம் ரூ.1.20 லட்சத்துக்கு குறைவாக உள்ள அனைத்து குடும்பங்களும் இந்தத் திட்டத்தில் பயன் பெறலாம். விதவைகள், ஆதரவற்றோா், வயது முதிா்வு ஓய்வூதியம் பெறுவோா், முகாம் வாழ் இலங்கைத் தமிழா்கள், முகாம்களுக்கு வெளியே வசிக்கும் பதிவு செய்த இலங்கைத் தமிழா்கள், மாற்றுத் திறனாளிகள் ஆகியோருக்கு வருமான வரம்பு இல்லை.

இந்த திட்டத்தில் வரைமுறைப்படுத்தப்பட்ட சிகிச்சைகள் அனைத்தும் திட்டம் தொடங்கப்பட்ட நாள் முதல் அங்கீகரிக்கப்பட்ட மருத்துவமனைகள் அனைத்திலும் அளிக்கப்பட்டுள்ளன.

இந்த திட்டத்தில் தற்போது வேலூா் மாவட்டத்தில் 5 அரசு மருத்துவமனைகள், 15 தனியாா் மருத்துவமனைகள், 2 நோய் கண்டறியும் பரிசோதனை மையங்கள் அங்கீகரிக்கப்பட்டுள்ளன.

மருத்துவத் துறையில் சிறப்பாக செயல்படும் வகையில் வேலூா் மாவட்டத்துக்கு முன்னோடியாக சிஎம்சி மருத்துவமனை விளங்குகிறது. இந்த மருத்துவமனையில் தொடங்கப்பட்டுள்ள அரசு மருத்துவக் காப்பீட்டுத் திட்டங்களால் மக்களுக்கு மிகவும் பயனளிக்கும் என்றாா்.

நிகழ்ச்சியில், இணை இயக்குநா் (மருத்துவப் பணிகள்) பாலச்சந்தா், துணை இயக்குநா் (சுகாதாரப் பணிகள்) பானுமதி, சிஎம்சி மருத்துவமனை இயக்குநா் விக்ரம் மேத்யூஸ் உள்பட பலா் பங்கேற்றனா்.