கோவை உப்பிலிபாளையம் ரவுண்டானாவில் சிக்னல்கள் அமைக்கும் பணி தீவிரமாக மேற்கொள்ளப்பட்டு வருகிறது.

கோவை அவிநாசி சாலையில் கோல்டுவின்ஸ் முதல் உப்பிலிபாளையம் வரை 10.01 கிலோ மீட்டா் தூரத்துக்கு உயா்மட்ட மேம்பாலம் அமைக்கப்பட்டுள்ளது. இப்பாலத்தை கடந்த 9ஆம் தேதி, முதல்வா் ஸ்டாலின் திறந்து வைத்தாா்.

அன்று முதல் பாலத்தில் வாகனப் போக்குவரத்து இயக்கப்பட்டு வருகிறது. இந்நிலையில் உப்பிலிபாளையம் ரவுண்டானா பகுதியில் கடும் போக்குவரத்து நெரிசல் ஏற்பட்டு வருகிறது. இங்கு பழைய அவிநாசி மேம்பாலத்தில் இருந்து வரும் வாகனங்கள், நஞ்சப்பா சாலையில் இருந்து வரும் வாகனங்கள், ஆடிஸ் வீதியில் இருந்து வரும் வாகனங்கள் வந்து சந்திப்பதால் இந்த நெருக்கடி ஏற்பட்டு வருகிறது.

இந்நிலையில், போக்குவரத்து போலீஸாா், நெரிசலைக் கட்டுப்படுத்தும் பணியில் ஈடுபட்டு வருகின்றனா். ஆயினும், அப்பகுதியில் போக்குவரத்து நெரிசல் குறையவில்லை. வெளியூரில் இருந்து வரும் வாகனங்கள், குறிப்பிட்ட இடங்களுக்கு செல்ல எந்த இறங்குதளத்தில் இறங்குவது எனத் தெரியாததால் இந்த நெருக்கடி ஏற்படுவதாக போலீஸ் தரப்பில் கூறப்படுகிறது. எனவே, மேம்பாலத்தின் இருபுறங்களிலும் எங்கெங்கு இறங்குதளங்கள் உள்ளன.

எந்த சாலையில் வாகனங்கள் செல்ல வேண்டும் என்பன போன்ற அறிவிப்பு பலகைகள் பாலத்தின் இருபுறமும் வைக்க நடவடிக்கை எடுக்கப்பட்டது. இருப்பினும், முழுமையாக போக்குவரத்து நெருக்கடி தீரவில்லை. போக்குவரத்து சிக்னல் அமைக்கப்பட்ட பிறகு, முழுமையாக வாகன நெருக்கடிக்கு தீா்வு ஏற்படும் என மாநகரக் காவல் ஆணையா் சரவணசுந்தா் அண்மையில் தெரிவித்தாா்.

இதைத்தொடா்ந்து, போக்குவரத்து போலீஸ் சாா்பில் சிக்னல்கள் அமைக்கும் பணி மேற்கொள்ளப்பட்டு உள்ளது. இதன் ஒரு பகுதியாக தண்டுமாரியம்மன் கோயில் அருகில் உப்பிலிபாளையம் ரவுண்டானாவில் 4 சாலைகள் சந்திக்கும் பகுதியில் சிக்னல்கள் அமைக்கும் பணி நடைபெற்று வருகிறது.