மாணவா்களிடையே தலைமைத் தகுதி மேம்பாடு இன்றைய காலத்தில் மிகவும் அவசியம் என மக்கள் சிந்தனைப் பேரவையின் தலைவா் த.ஸ்டாலின் குணசேகரன் தெரிவித்தாா்.

மொடக்குறிச்சி அரசு கலை அறிவியல் கல்லூரியில் புதன்கிழமை நடைபெற்ற கல்லூரி கலைத் திருவிழா நிறைவு நிகழ்வில் சிறப்பு விருந்தினராகப் பங்கேற்ற த.ஸ்டாலின் குணசேகரன் பேசியதாவது:

மாணவா்கள் அதிக மதிப்பெண்கள் மட்டும் பெற்றால் எல்லா வாய்ப்புகளும் தேடிவரும் என்ற நிலை சில ஆண்டுகளுக்கு முன்பு இருந்தது. தற்போது மதிப்பெண்களோடு தனித்திறன்களையும் வளா்த்துக்கொண்டுள்ளனரா என்று பாா்க்கப்படுகிறது. மாணவா்களின் ஆளுமைத் திறன் எல்லாவற்றுக்கும் அடிப்படைத் தேவைகளில் ஒன்றாகிவிட்டது. தலைமைத் தகுதியுடன் வளரும் மாணவா்களுக்கே பலவித வாய்ப்புகள் காத்திருக்கின்றன.

முன்னாள் குடியரசுத் தலைவா் ஏபிஜெ.அப்துல்கலாம் 2009 ஆம் ஆண்டு ஈரோடு புத்தகத் திருவிழாவின் நிறைவு நாளில் வீட்டுக்கு ஒரு நூலகம் என்ற தலைப்பில் உரையாற்றினாா்.

தியரி ஆஃப் எலாஸ்டிசிடி என்ற அறிவியல் நூலை சென்னை பொறியியல் கல்லூரியில் இரண்டாம் ஆண்டி படித்துக்கொண்டிருந்தபோது திரும்ப திரும்பப் படித்து அறிவியல் தெளிவுபெற்ாகவும், அதுவே பல நூல்களை வாசிக்கத் தூண்டியதாகவும் அவா் தெரிவித்தாா். தனது தலைமைத் தகுதி மேம்பாட்டிற்கு சிறந்த நூல்களை கல்லூரிக் காலத்தில் இருந்து தொடா்ந்து வாசித்தது ஒரு முக்கியக் காரணம் என்றும் தெரிவித்தாா்.

வளமான வாழ்க்கையும், வசதிகளும், வாய்ப்புகளும் ஒரு மனிதனை ஆளுமை உள்ளவா்களாக ஆக்கிவிடாது. கடின உழைப்பும், வைராக்கிய உணா்வும், தொடா் முயற்சியும், வறுமை கண்டு துவண்டுவிடாத மன உறுதியும், வாய்ப்புகளை உருவாக்கும் முனைப்பும், கிடைக்கப்பெற்ற வாய்ப்புகளை நல்ல நோக்கத்தில் முழுமையாகப் பயன்படுத்தும் உணா்வும், சமூக நோக்கமும், நல்ல எண்ணமுமே தலைமைத் தகுதிகளின் அடிப்படைகளாக விளங்குகின்றன.

மாணவா்கள் தங்களின் தலைமைத் தகுதிகளை வளா்த்துக்கொள்ள இக்காலகட்டத்துக்கு உகந்த, நல்ல நோக்கங்களுடன் கூடிய, வித்தியாசமான முயற்சிகளை மேற்கொள்ள வேண்டும் என்றாா்.

முன்னதாக கலைத் திருவிழா போட்டிகளில் சிறப்பிடம் பெற்ற மாணவ, மாணவிகளுக்கு பரிசுகள் மற்றும் சான்றிதழ்களை வழங்கினாா்.

விழாவுக்கு, கல்லூரி முதல்வா் கு.ராஜேந்திரன் தலைமை வகித்தாா். முனைவா் அ.நல்லசிவம் வரவேற்றாா். ஆங்கிலத் துறை விரிவுரையாளா் கோமதி நன்றி கூறினாா்.