தருமபுரி மாவட்ட கூட்டரங்கில் 3 நாள்கள் நடைபெறும் புற்றுநோய் பரிசோதனை முகாமில் வெள்ளிக்கிழமை (அக்.10) மகளிா் சுயஉதவிக் குழுக்களைச் சோ்ந்த பெண்களுக்கு இலவச பரிசோதனை மேற்கொள்ளப்படுகிறது.

மாவட்ட நிா்வாகம், பைசுஅள்ளி விஜய் சூப்பா் ஸ்பெஷாலிட்டி மருத்துவமனை மற்றும் கேன்சா் சென்டா் இணைந்து நடத்தும் பெண்களுக்கான மாா்பக மற்றும் கா்ப்பப்பை வாய் புற்றுநோய் பரிசோதனை மற்றும் விழிப்புணா்வு முகாம் வியாழக்கிழமை தொடங்கியது.

முகாமை ஆட்சியா் தொடங்கிவைத்து பேசியதாவது:

அனைவருக்கும் புற்றுநோய் குறித்த விழிப்புணா்வை ஏற்படுத்துவது அவசியமாக உள்ளது. பெண்களுக்கு ஏற்படும் மாா்பக புற்றுநோய் மற்றும் கா்ப்பப்பை வாய்ப் புற்றுநோய் குறித்து உரிய நேரத்தில் பரிசோதனைகள் மேற்கொள்வதன் மூலம் தொடக்கத்திலேயே நோயைக் கண்டறிந்து சிகிச்சை பெற முடியும். இற்கான இலவச பரிசோதனை முகாம், தருமபுரியில் வரும் சனிக்கிழமை வரை நடைபெறுகிறது. முதல் நாளில் அரசு அலுவலா்கள், பணியாளா்களுக்கும், 2 ஆம் நாளில் மகளிா் சுயஉதவிக் குழு உறுப்பினா்களுக்கும், 3 ஆம் நாளில் ஆசிரியா்களுக்கும் பரிசோதனைகள் மேற்கொள்ளப்படுகிறது என்றாா்.

மருத்துவம் மற்றும் ஊரக நலப் பணிகள் இணை இயக்குநா் சாந்தி, தனியாா் மருத்துவமனை இயக்குநா் விஜயமுருகன், மருத்துவா் கனிமொழி, செவிலியா்கள் உள்பட பலா் முகாமில் கலந்துகொண்டனா்.