பென்னாகரம் பேருந்து நிலையத்தில் நிறுத்தப்படும் தனியாா் சொகுசு காா்கள், இருசக்கர வாகனங்களால் அரசுப் பேருந்துகள் எளிதில் பயணிகளை ஏற்றிக் கொண்டு வெளியே செல்ல முடியாத சூழல் நிலவுவதாக ஓட்டுநா்கள் புகாா் தெரிவிக்கின்றனா்.

தருமபுரி மாவட்டம், பென்னாகரம் பகுதியில் சுமாா் 10000க்கும் மேற்பட்டோா் வசித்து வருகின்றனா். பென்னாகரம் பகுதி மலைகள் சூழ்ந்த பகுதி என்பதால் சுமாா் 50க்கும் மேற்பட்ட குக்கிராமங்கள் உள்ளன. மலைக்கிராமப் பகுதிகளில் இருந்து கல்வி, வேலை வாய்ப்பு, மருத்துவம், விவசாயப் பொருள்களைச் சந்தைப்படுத்துதல் உள்ளிட்டவற்றுக்காக பென்னாகரம் பகுதிக்கு நாள்தோறும் ஏராளமானோா் வந்து செல்கின்றனா்.

பென்னாகரம் பகுதிக்கு மூலதனம் மானியத் நிதி திட்டத்தின்கீழ் ரூ. 4.50 கோடி மதிப்பீட்டில் கடந்த இரண்டு ஆண்டுகளுக்கு முன்பு பேருந்து நிலையம் அமைக்கப்பட்டது. இந்த பேருந்து நிலையமானது பென்னாகரம் பேரூராட்சி நிா்வாகத்தின் கட்டுப்பாட்டில் உள்ளது.

பென்னாகரம் பேருந்து நிலையத்திலிருந்து கா்நாடகம், ஆந்திரம் உள்ளிட்ட வெளிமாநிலங்களுக்கும், தமிழகத்தின் பல்வேறு மாவட்டங்களுக்கும் பேருந்துகள் இயக்கப்படுகின்றன. மேலும் தமிழகத்தின் முதன்மை சுற்றுலாத் தலமான ஒகேனக்கல் மிக அருகில் உள்ளதால் பென்னாகரம் பேருந்து நிலையம் எப்போதும் மக்கள் கூட்டம் நிறைந்து காணப்படும். பேருந்து நிலையத்தின் உள்பகுதியில் காலை, மாலை வேலைகளில் சுமாா் 20க்கும் மேற்பட்ட சொகுசுக் காா்கள், இருசக்கர வாகனங்கள் நிறுத்தப்படுவதால்,

பென்னாகரத்தை சுற்றியுள்ள கிராம பகுதிகளுக்குச் செல்லக்கூடிய நகரப் பேருந்துகள், வெளிமாவட்டங்களுக்கு செல்லக்கூடிய விரைவு பேருந்துகள் எளிதில் உள்ளே வந்து அவற்றுக்குரிய இடத்தில் நிறுத்த முடியாத நிலையும், குறிப்பிட்ட நேரத்திற்கு அந்தந்த பகுதிகளுக்கு செல்லக்கூடிய பேருந்துகள் எளிதில் வெளியே வரமுடியாமல் இடையூறுகள் ஏற்படுவதாகவும் பேருந்து ஓட்டுநா்கள் தெரிவிக்கின்றனா்.

இதுகுறித்து பென்னாகரம் போக்குவரத்து பணிமனை மேலாளா் கூறியதாவது:

நாள்தோறும் காலை, மாலை நேரங்களில் 6 மணிக்கு மேல் சொகுசு காா்கள் பென்னாகரம் பேருந்து நிலையத்தில் நிறுத்தப்படுகின்றன. இதனால் அரசு பேருந்துகள் ஒன்றை ஒன்று எளிதில் கடக்க முடியாமல் இடையூறு ஏற்படுவதாக ஓட்டுநா்கள் தெரிவிக்கின்றனா். பேரூராட்சி நிா்வாகத்தின் கட்டுப்பாட்டில் உள்ள பென்னாகரம் பேருந்து நிலையத்தில் தனியாா் சொகுசு காா்கள் நிறுத்துவதற்கு அனுமதிக்கக் கூடாது என கடிதம் அனுப்ப உள்ளதாகத் தெரிவித்தாா். மேலும், இடையூறு ஏற்படாத வகையில் அரசுப் பேருந்துகள் பேருந்து நிலையத்திற்கு சென்று வரும் செல்லும் வகையில் பேரூராட்சி நிா்வாகத்தினா் நடவடிக்கை எடுக்க வேண்டும் என தெரிவித்துள்ளாா்.