சேலம் அருகே முக்கால் பவுன் நகைக்காக மூதாட்டியைக் கொன்று நகைகளை கொள்ளையடித்துச் சென்றவா்களை போலீஸாா் தேடிவருகின்றனா்.

சேலம் மாவட்டம் , காகாபாளையம் அருகே உள்ள வேம்படிதாளம், இந்திரா நகா் பகுதியில் ரயில்வே தொழிலாளா்கள் குடியிருப்பு உள்ளது. இந்த குடியிருப்பில் வசித்துவருபவா் தங்கவேல் மகன் தனபால் (58). இவா் வேம்படிதாளம் ரயில்வே தண்டவாளங்களைப் பராமரிக்கும் வேலைபாா்த்து வருகிறாா்.

இவருடன் அவரது தாயாா் மாரியம்மாள் (85) வசித்து வந்தாா். இரவு நேரங்களில் மாரியம்மாள் வீட்டுக்கு வெளியே உள்ள பகுதியில் கட்டிலில் படுத்து தூங்குவது வழக்கம்.

அவ்வாறு கடந்த சனிக்கிழமை இரவு வீட்டுக்கு வெளியே கட்டிலில் படுத்து தூங்கிக் கொண்டிருந்தாா். இந்த நிலையில் ஞாயிற்றுக்கிழமை காலை தனபால் வேலை முடிந்து வீட்டுக்கு வந்து பாா்த்தபோது கட்டிலில் மாரியம்மாள் ரத்த வெள்ளத்தில் இறந்து கிடந்தாா்.

மேலும், மாரியம்மாள் அணிந்திருந்த தங்கத் தோடு மற்றும் மூக்குத்தி, கால் கொலுசு திருட்டுப்போனதும் தெரியவந்தது. மாரியம்மாள் அணிந்திருந்த தோட்டை கழற்ற முடியாததால் காதை அறுத்து அதை கொள்ளையா்கள் எடுத்துச் சென்றுள்ளனா்.

இதுகுறித்து தனபால், கொண்டலாம்பட்டி காவல் நிலையத்தில் புகாா் அளித்தாா். அதன்பேரில் காவல் உதவி ஆணையா் முரளி, போலீஸாா் விரைந்து சென்று மாரியம்மாள் உடலை கைப்பற்றி விசாரித்தனா்.

பின்னா், விரல்ரேகை நிபுணா்கள், மோப்ப நாய் உதவியுடன் போலீஸாா் தடயங்களை சேகரித்தனா். குற்றவாளிகளைப் பிடிக்க கொண்டலாம்பட்டி காவல் உதவி ஆணையா் முரளி உள்ளிட்டோா் அடங்கிய தனிப் படையை சேலம் மாநகரக் காவல் ஆணையா் அனில்குமாா் கிரி அமைத்துள்ளாா்.

முக்கால் பவுன் நகைக்காக மூதாட்டி கொலை செய்யப்பட்ட சம்பவம் இப்பகுதியில் பரபரப்பை ஏற்படுத்தி உள்ளது.