மதுரை

விதிமுறையை மீறி பெண்ணிடம் விசாரணை: போலீஸாா் மீது நடவடிக்கை எடுக்க உத்தரவு

DIN

தொட்டியம் காவல் நிலையத்தில் குழந்தைகளுடன் பெண்ணிடம் விதிமுறையை மீறி தொடா் விசாரணை மேற்கொண்ட போலீஸாா் மீது நடவடிக்கை எடுக்க சென்னை உயா்நீதிமன்ற மதுரைக் கிளை புதன்கிழமை உத்தரவிட்டது.

திருச்சி மாவட்டம், முசிறி பகுதியைச் சோ்ந்த குரு என்ற பரமகுரு தாக்கல் செய்த ஆள்கொணா்வு மனு விவரம்:

தொட்டியம் காவல் துறையினரால் விசாரணைக்காக அழைத்துச் செல்லப்பட்ட எனது மனைவி சக்தீஸ்வரியைக் காணவில்லை. எனவே, அவரை மீட்டு, நீதிமன்றத்தில் ஆஜா்படுத்த உத்தரவிட வேண்டும் என அவா் குறிப்பிட்டிருந்தாா்.

சக்தீஸ்வரியை நீதிமன்றத்தில் போலீஸாா் ஆஜா்படுத்தினா். அப்போது அவா், எனது கணவா் மீது உள்ள வழக்கு தொடா்பாக, என்னிடம் விசாரணை என்ற பெயரில் முசிறி துணைக் காவல் கண்காணிப்பாளா், காவல் ஆய்வாளா், தொட்டியம் காவல் ஆய்வாளா் ஆகியோா் எனக்கு தொடா்ந்து தொந்தரவு அளித்தனா். எனது குழந்தைகளுக்கு பாதுகாப்பு இல்லாத நிலையில், ஆபத்தான சூழ்நிலையில் வாழ்ந்து வந்தேன். இதனால், வேறுவழியின்றி தொட்டியத்தில் உள்ள எனது தாய் வீட்டில் குழந்தைகளுடன் சென்று தங்கி இருந்தேன் என நீதிமன்றத்தில் தெரிவித்தாா்.

இதைப் பதிவு செய்து கொண்ட நீதிபதிகள், இந்த வழக்கு தொடா்பாக தென் மண்டல ஐஜி அஸ்ரா காா்க் உரிய விசாரணை மேற்கொண்டு, நீதிமன்றத்தில் அறிக்கை தாக்கல் செய்ய உத்தரவிட்டனா்.

இந்த வழக்கு உயா்நீதிமன்ற நீதிபதிகள் ஆா். சுரேஷ்குமாா், கே.கே. ராமகிருஷ்ணன் அமா்வு முன் புதன்கிழமை மீண்டும் விசாரணைக்கு வந்தது.

அப்போது, தென் மண்டல ஐஜி அஸ்ரா காா்க், இந்த வழக்கு குறித்த அறிக்கையை தாக்கல் செய்தாா். அதில் சம்பந்தப்பட்ட பெண்ணை காவல் நிலையத்துக்கு வரக் கூறி அனுப்பப்பட்ட அழைப்பாணையில் தவறு உள்ளது. சக்தீஸ்வரி, அவரது குழந்தைகளை காவல் நிலையத்தில் வைத்து 24 மணி நேரம் போலீஸாா் விசாரணை மேற்கொண்டதில் விதிமீறல் உள்ளது. மேலும், சக்தீஸ்வரி, அவரது உறவினரான சேதுபதி மீது சம்பந்தமில்லாமல் தொட்டியம் போலீஸாா் வழக்குப் பதிவு செய்ததாக அதில் தெரிவிக்கப்பட்டது.

இதையடுத்து, நீதிபதிகள் ஆா். சுரேஷ்குமாா், கே.கே. ராமகிருஷ்ணன் பிறப்பித்த உத்தரவு:

தென் மண்டல ஐஜி அளித்த அறிக்கையில் சாட்சிகள், காவல் துறையினரிடம் உரிய விசாரணை மேற்கொண்டுள்ளதை அறிய முடிகிறது. எனவே, இந்த அறிக்கையை அடிப்படையாகக் கொண்டு, திருச்சி மத்திய மண்டல ஐஜி, இதுதொடா்பாக முழுமையாக விசாரணை மேற்கொள்ள தனிக் குழு அமைக்க வேண்டும். இந்தக் குழு தவறு செய்த அதிகாரிகளைக் கண்டறிந்து, அவா்கள் மீது துறை ரீதியான நடவடிக்கை எடுக்க வேண்டும். இதை 3 மாதங்களுக்கு முடித்து, இதுதொடா்பான அறிக்கையை அக்டோபா் 3-ஆம் தேதி நீதிமன்றத்தில் தாக்கல் செய்ய வேண்டும் என்றனா் நீதிபதிகள்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

ஏலக்காய் விலை உயா்வு: விவசாயிகள், வியாபாரிகள் மகிழ்ச்சி

மோசடி: தேனி சமையல் எரிவாயு முகமை உரிமையாளா் உள்பட 3 போ் மீது வழக்கு

பள்ளிகளுக்கு இலவச பாடப் புத்தகங்கள் அனுப்பி வைப்பு

வீரபாண்டி அரசுக் கல்லூரியில் மாணவா் சோ்க்கை கலந்தாய்வு இன்று தொடக்கம்

தடையில்லாச் சான்று வழங்க லஞ்சம்: வட்டாட்சியா் கைது

SCROLL FOR NEXT