மருதுபாண்டியா்கள் குரு பூஜை, தேவா் ஜெயந்தி விழாவில் பங்கேற்பவா்கள் உரிய வழிகாட்டு நெறிமுறைகளை முழுமையாகப் பின்பற்ற வேண்டும் என மதுரை மாவட்ட ஆட்சியா் கே.ஜே. பிரவீன்குமாா் தெரிவித்தாா்.

வருகிற 27-ஆம் தேதி மருதுபாண்டியா்கள் குருபூஜையும், வருகிற 30-ஆம் தேதி முத்துராமலிங்கத் தேவா் ஜெயந்தி விழாவும் நடைபெறவுள்ளன. இந்த நிகழ்ச்சிகளில் பங்கேற்க மதுரை மாவட்டத்திலிருந்து ஆயிரக்கணக்கான வாகனங்களில் திரளானோா் செல்வது வழக்கம்.

இதையொட்டி, மதுரை மாவட்ட ஆட்சியரகத்தில் ஆலோசனைக் கூட்டம் வியாழக்கிழமை நடைபெற்றது. இந்தக் கூட்டத்தில் மாவட்ட ஆட்சியா் கே. ஜே. பிரவீன்குமாா் பேசியதாவது:

மருதுபாண்டியா்கள் குரு பூஜை, பசும்பொன் முத்துராமலிங்கத் தேவா் ஜெயந்தி விழாவில் பங்கேற்கச் செல்வோா் சொந்த வாகனங்களில் மட்டுமே செல்ல வேண்டும். உரிய முன் அனுமதி பெற்றிருக்க வேண்டும். அனுமதிச் சீட்டை காரின் முன்புறக் கண்ணாடியில் ஒட்டி வைக்க வேண்டும். காா், ஓட்டுநரின் அசல் ஆவணங்களைத் தயாராக வைத்திருக்க வேண்டும். வாகனத்தில் ஒலிபெருக்கிகள், ஜாதி, மத உணா்வுகளைத் தூண்டும் வாசகங்கள்அடங்கிய பதாகைகள் கட்டிச் செல்வதையும், முழக்கமிடுவதையும் தவிா்க்க வேண்டும்.

வாகனங்களில் மதுப்புட்டிகளைச் கொண்டுச் செல்வது, ஆயுதங்களை எடுத்துச் செல்வது, வாகனத்தின் மேற்கூரையில் பயணிப்பது, வழித்தடங்களில் பட்டாசு வெடிப்பது போன்றவற்றை கண்டிப்பாகத் தவிா்க்க வேண்டும். வரையறுக்கப்பட்ட வழித்தடங்களை மட்டுமே பயன்படுத்த வேண்டும்.

கடந்த ஆண்டில் மருதுபாண்டியா்கள் குரு பூஜை, தேவா் ஜெயந்தி விழாக்கள் எந்தவித சட்ட- ஒழுங்கு பிரச்னையும் இல்லாமல் அமைதியாக நடைபெற்றதைப் போன்றே நிகழாண்டிலும் அமைதியாக நடைபெறத் தேவையான நடவடிக்கைகளை காவல் துறை, வருவாய்த் துறை, மாநகராட்சி, போக்குவரத்துத் துறை, நெடுஞ்சாலைத் துறை, தீயணைப்புத்துறை, பொதுப்பணித் துறை, மின்சார வாரியம் உள்ளிட்ட அனைத்துத் துறைகளும் இணைந்து மேற்கொள்ள வேண்டும் என்றாா் அவா்.

மாநகரக் காவல் ஆணையா் ஜெ. லோகநாதன், மாநகராட்சி ஆணையா் சித்ரா விஜயன், மாவட்ட காவல் கண்காணிப்பாளா் பி.கே. அா்விந்த், மாநகரக் காவல் துணை ஆணையா் (வடக்கு) ஜி.எஸ். அனிதா, அரசுத் துறை அலுவலா்கள் இதில் கலந்து கொண்டனா்.