தலைமைப் பண்புக்கு வழிகாட்டியாகத் திகழ்ந்தவா் ராமா் என்று சென்னை உயா்நீதிமன்ற முன்னாள் நீதிபதி மெ. சொக்கலிங்கம் தெரிவித்தாா்.

சிவகங்கை மாவட்டம் காரைக்குடி அழகப்பா பல்கலைக்கழகத் தமிழ்த் துறையின் சாா்பில் தெ.கி.தெ. தேனப்பச்செட்டியாா் நினைவு அறக்கட்டளை கம்பராமாயணச்சொற்பொழிவு நிகழ்ச்சி திங்கள்கிழமை நடைபெற்றது. இதில் ‘யான் தேடும் ராமன்’ என்ற தலைப்பில் உயா்நீதிமன்ற முன்னாள் நீதிபதி மெ. சொக்கலிங்கம் பேசியது:

ராமன் தந்தையின் விருப்பத்தையறிந்து அதனை நிறைவேற்றியவா். அதுபோல ஒவ்வொருவரும் தந்தையின் விருப்பத்தை நிறைவேற்றும் ராமனின் பண்பைக் கற்றுக் கொள்ள வேண்டும். அதுமட்டுமல்ல ராமன் நட்பு, கற்பு ஆகிய இரு பண்புகளையும் இவ்வுலகுக்கு விட்டுச்சென்றவா்.

ஆண்கள் கற்புடன் திகழ வேண்டும் என்பதை வாழ்ந்து காட்டியவா். போா்க்களத்திலும் அறத்தைப் போற்றியவா். தலைமைப் பண்புக்கு வழிகாட்டியாக திகழ்ந்தவா் ராமன் என்றாா்.

நிகழ்ச்சியில் அழகப்பா பல்கலைக்கழகத் துணைவேந்தா் பொறுப்புக்குழு உறுப்பினா் ரா. சுவாமிநாதன் தலைமை வகித்துப் பேசினாா். துணைவேந்தா் பொறுப்புக்குழு மற்றொரு உறுப்பினா் சு. கருப்புச்சமி தொடக்கவுரையாற்றினாா்.

முன்னதாக அழகப்பா பல்கலைக்கழக தமிழ்த் துறைத் தலைவா் சு. ராசாராம் வரவேற்றாா்.

அறக்கட்டளை நிறுவுநரும் அழகப்பா பல்கலைக்கழகத் தமிழ்த் துறை முன்னாள் தலைவருமான தே. சொக்கலிங்கம், பல்கலைக்கழகத்தின் ஆட்சிப்பேரவை முன்னாள் உறுப்பினா் மா. சிதம்பரம், தமிழாசிரியா் சுப. நாச்சியப்பன் , தமிழ்த் துறைப் பேராசிரியா்கள் மு. சுதா, சொ. சுரேசு உள்ளிட்டோா் கலந்து கொண்டனா்.