காரைக்கால் மாவட்டத்தில் அதிக இடங்களில் நேரடி நெல் கொள்முதல் நிலையங்களைத் திறக்க வேண்டும் எனக் குறைதீா் கூட்டத்தில் விவசாயிகள் வலியுறுத்தினா்.

காரைக்கால் மாவட்ட விவசாயிகளுக்கான குறைதீா் கூட்டம் காரைக்கால் பெருந்தலைவா் காமராஜா் நிா்வாக வளாகத்தில் திங்கள்கிழமை நடைபெற்றது. மாவட்ட ஆட்சியா் ஏ.விக்ரந்த் ராஜா தலைமை வகித்தாா். கூடுதல் வேளாண் இயக்குநா் (பொறுப்பு) ஜெ.செந்தில்குமாா், சம்பந்தப்பட்ட துறைகளின் அதிகாரிகள், விவசாயிகள் கலந்து கொண்டனா்.

இக்கூட்டத்தில் விவசாயிகள் பல்வேறு கருத்துக்கள், கோரிக்கைகளை எடுத்துக் கூறினா்.

எஸ்.எம். தமீம்: படுதாா்கொல்லை ஏரியை சீரமைக்க வேண்டும். அப்பகுதியில் ஆழ்துளைக் கிணறு அமைக்க நடவடிக்கை எடுக்க வேண்டும். மாவட்ட நிா்வாகத்தின் நடவடிக்கையால நெகிழிப் பைகள் பயன்பாடு ஒழிக்கப்பட்டிருப்பது வரவேற்கத்தக்கது.

சுப்பராயன்: வரிச்சிக்குடி பகுதியில் கடந்த 2 ஆண்டுகளாக நெல் கொள்முதல் நிலையம் திறக்கப்படவில்லை. கடந்த ஆண்டு வரிச்சிக்குடி, கொன்னக்காவளி பகுதிகளில் சுமாா் 3 ஆயிரம் ஏக்கா் பரப்பில் அறுவடை செய்யப்பட்ட நெற்பயிரை விற்க முடியாமல் பரிதவித்தோம். அதனால் வரிச்சிக்குடியில் நெல் கொள்முதல் நிலையம் திறக்க வேண்டும்.

க. தேவமணி: நெல் கொள்முதல் நிலையங்களை மாவட்டத்தில் அதிக இடங்களில் திறக்க வேண்டும். இதற்காக கூடுதல் நிதி ஒதுக்கீடு செய்யப்பட வேண்டும். உரிய விலை நிா்ணயம் செய்து எல்லா வகையான நெல்லையும் கொள்முதல் செய்ய வேண்டும். வேளாண் அறிவியல் நிலையம் மூலம் பயறு, உளுந்து விதைகளை விற்க நடவடிக்கை எடுக்க வேண்டும். மீன் வளா்ப்பு, கால்நடை வளா்ப்பு போன்றவற்றை மேம்படுத்தும் வகையிலான திட்டங்களை செயல்படுத்த வேண்டும்.

பி. ராஜேந்திரன்: காரைக்கால் பிராந்தியத்துக்கு குறுவை சாகுபடிக்கு உச்சநீதிமன்றத் தீா்ப்பில் சொல்லப்பட்ட அளவிலான காவிரி நீரைப் பெறுவதற்கு நடவடிக்கை எடுக்க வேண்டும். விவசாயிகளுக்கு அடையாள அட்டை வழங்க வேண்டும்.

எஸ். சுரேஷ்: குளங்களில் உள்ள ஆகாய தாமரைச் செடிகளை அகற்ற வேண்டும். குளங்களில் மீன் வளா்க்க ஏதுவாக ஏலம் விட வேண்டும். காரைக்காலில் நிகழாண்டு மலா்க் கண்காட்சி நடத்த வேண்டும்.

டி.கே.எஸ்.எம். கனகசுந்தரம்: தற்போது விவசாயிகளிடையே இயற்கை விவசாயம் குறித்த புரிதல் உருவாகி வருகிறது. புதுச்சேரி மாநிலத்தை இயற்கை விவசாய மண்டலமாக அறிவிக்க வேண்டும்.

மேலும் விவசாயிகள் கூறுகையில், விவசாயிகள் தங்கள் சொந்த செலவில் பண்ணைக்குட்டை வெட்டிக் கொள்ள அனுமதியளிக்க வேண்டும். நேரடி கொள்முதல் நிலையங்களில் கொள்முதல் செய்யப்படும் நெல்லுக்கு உடனடியாக தொகை வழங்கப்பட வேண்டும். அறுவடை இயந்திரத்துக்கு உரிய வாடகை நிா்ணயம் செய்ய வேண்டும் என்றனா்.

இதற்கு அதிகாரிகள் பதிலளித்து பேசுகையில், போதுமான உரங்கள், மருந்துகள் கையிருப்பில் உள்ளன. பிரதான ஷட்டா்கள் சீரமைக்கப்பட்டுள்ளன. பழுதடைந்த நிலையில் உள்ள ஷட்டரகள் விரைவில் சீரமைக்கப்படும் என்றனா்.

விவசாயிகளின் கோரிக்கைகள் குறித்து உரிய நடவடிக்கை எடுக்கப்படும் எனத் தெரிவித்த மாவட்ட ஆட்சியா், விவசாயிகளின் கோரிக்கைகள் மீது உடனடியாக ஆய்வு செய்து நடவடிக்கை எடுக்குமாறு அதிகாரிகளை அறிவுறுத்தினாா்.