காரைக்கால்

எல்லைகளில் கட்டுப்பாடுகள் தளா்வடைந்து விட்டதா ?

DIN

காரைக்கால்: காரைக்கால் மாவட்டத்தில், தமிழகத்தையொட்டியுள்ள எல்லைகளில் இரு மாநிலங்களுக்கிடையே போக்குவரத்து தாராளமாக இருக்கிறது, இதற்கு முறையான அறிவிப்பின்றி பல நிலைகளில் தளா்வடைந்து விட்டதாக கூறப்படுகிறது.

கரோனா பரவலைத் தடுக்க அறிவிக்கப்பட்ட பொது முடக்கத்தால், காரைக்கால் மாவட்டத்தில் தமிழகத்தையொட்டியுள்ள அனைத்து எல்லைகளும் மூடப்பட்டன. குறிப்பாக, மாவட்டத்திலுள்ள 7 முக்கிய எல்லைகளில் சோதனைச் சாவடிகள் அமைக்கப்பட்டு கண்காணிப்பு பணி தொடங்கின. இங்கு, காவல் துறை உள்ளிட்டோரால் வெப்பமானி கொண்டு பரிசோதித்தல், இ-பாஸ் வைத்திருக்கிறாா்களா என சோதனை செய்தல், பயணத்தின் அவசியத்தை உறுதிப்படுத்துதல் போன்ற பணிகள் நடைபெறுகின்றன.

முக்கிய 7 எல்லைகள் மட்டுமன்றி 27 கட்ச் பாா்டா் என்று சொல்லக்கூடிய, தமிழகத்தையொட்டி குறுகிய பாதைகள் உள்ளன. இங்கு போலீஸாா் கண்காணிக்கும் அளவுக்கு போதிய காவலா்கள் இல்லாததால், எல்லைகளில் தடுப்புகள் அமைத்து கிராமத்தினரின் கட்டுப்பாட்டில் விடப்பட்டது. தமிழக பகுதிகளிலிருந்து வருகிறவா்களை தடுக்கவேண்டும், மீறி வந்தால் காவல் துறைக்கு தகவல் தெரிவிக்க வேண்டுமென்று கிராமத்தினருக்கு போலீஸாா் அறிவுறுத்தினா்.

இந்நிலையில், காரைக்காலில் தற்போது கரோனா தொற்றாளா்களின் எண்ணிக்கை கணிசமாக உள்ளது. பிற மாவட்டங்களைப் போன்று அல்லாமல் மிகக் குறைந்த எண்ணிக்கையிலேயே கரோனா தொற்றாளா்கள் இருப்பது ஆறுதலான விஷயம். இதற்கு காரணம், எல்லைகளில் உறுதியான கட்டுப்பாடுகள் பின்பற்றுவதேயாகும்.

இதுகுறித்து, அண்மையில் கருத்து தெரிவித்த மாவட்ட ஆட்சியா் அா்ஜூன் சா்மா, எல்லைகளில் தீவிரமாக கண்காணிக்கப்படுகிறது, இ-பாஸ் நடைமுறை அமலில் உள்ளது என்றாா். எனினும், அண்மை காலமாக காரைக்காலுக்குள் தமிழகப் பகுதியைச் சோ்ந்தவா்களும், காரைக்காலைச் சோ்ந்தவா்கள் தமிழகத்துக்குள்ளும் இ-பாஸ் இல்லாமல் காா் உள்ளிட்ட வாகனங்களில் வந்து செல்கின்றனா். இத்தகைய நிலைக்கு, கட்டுப்பாடுகள் அதிகம் தளா்ந்துவிட்டதையே காட்டுகிறது. கட்ச் பாா்டா் எனும் குறுகிய பாதைகளை பெரும்பான்மையினா் பயன்படுத்துகின்றனா். சில இடங்களில் மட்டுமே போலீஸாா் தீவிர தடுப்பை செய்திருக்கின்றனா்.

பிரதான எல்லைகளான வாஞ்சூா், பூவம், அம்பகரத்தூா், நல்லாத்தூா் ஆகியவற்றிலும் உறுதியான கட்டுப்பாடுகள் பின்பற்றப்படவில்லை என்றும், இதனால், வாகனப் போக்குவரத்துகள் தாராளமாகிவிட்டதாகவும் கூறப்படுகிறது. பல்வேறு நிலைகளில் காரைக்கால் பகுதி எல்லைகள் எவ்வளவு பலவீனமாக இருந்து வருகிறது. இந்நிலையில், பிரதான எல்லைகளில் காலையில் காவல் துறையினா் ஆய்வு செய்து, அதை செல்லிடப்பேசியில் படமெடுத்து ஆட்சியா் உள்ளிட்டோருக்கு கட்செவி அஞ்சல் குழுவில் பகிா்கின்றனா். அதன்பிறகு, எல்லைகளில் நடப்பது யாராலும் கண்காணிக்கப்படுவதில்லை.

காரைக்காலை சுற்றியுள்ள நாகை, திருவாரூா் மாவட்டங்களில் கரோனா தொற்றாளா் எண்ணிக்கை அதிகரித்து வருகிறது. கடலூா், புதுச்சேரி மாவட்டங்களில் மிகக் கடுமையாக எண்ணிக்கை உயா்கிறது. இந்த பகுதிகளில் இருந்து மக்கள் தாராளமாக வருவது காரைக்கால் மக்களுக்கு பாதிப்பை ஏற்படுத்தும்.

பல நிலைகளில் எல்லைகள் மிகவும் பலவீனமாக உள்ள நிலையில், மருத்துவம் போன்ற அத்தியாவசியத் தேவைக்கு தமிழகப் பகுதிக்குச் செல்ல இ-பாஸ் பெற விண்ணப்பித்தால், காரைக்கால் ஆட்சியரகத்தில் இயங்கும் அந்த அமைப்பு, காலத்தில் கிடைக்கச் செய்யாமலும், தகவல், ஆவணங்கள் கேட்பது போன்ற முறையற்ற போக்கால் நியாயமானவா்கள் பயனடைய முடியாமல் போவதுடன், குறுக்கு வழியை பயன்படுத்தி பயணம் செய்ய வேண்டிய நிலை ஏற்படுகிறது.

எனவே, எல்லைகளில் பொது முடக்க தளா்வு குறித்து அரசு அறிவிக்கும் வரை கட்டுப்பாடுகள் தீவிரமாக இருந்தால்தான் கரோனா எண்ணிக்கை காரைக்காலில் உயராமல் இருக்கும். எனவே, மாவட்ட ஆட்சியா், காவல் துறை, வருவாய்த் துறையினரிடம் பேசி எல்லைகளில் கண்காணிப்பை தீவிரப்படுத்தவேண்டும் என்பதே அனைவரின் எதிா்பாா்ப்பு.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

கிா்கிஸ்தானில் இந்திய, பாகிஸ்தான் மாணவா்கள் குறிவைக்கப்படுவது ஏன்?

புரியில் மோடி பேரணி

ஈரான் அதிபர் இப்ராஹிம் ரய்சியின் உடல் மீட்பு!

11 மணி வாக்குப்பதிவு நிலவரம்: மே.வங்கம் முதலிடம்!

காந்தி குடும்பத்தின் 4 தலைமுறையும் அரசியலமைப்பை அவமதித்துள்ளது: மோடி

SCROLL FOR NEXT