காரைக்கால் பாலிடெக்னிக் கல்லூரி, கேந்திரிய வித்யாலய பள்ளிக்கு தலா ரூ. 9 லட்சம் மதிப்புள்ள சுத்திகரிக்கப்பட்ட இயந்திரத்தை ஓஎன்ஜிசி அளித்துள்ளது.

ஓஎன்ஜிசி சமூக பொறுப்பணா்வுத் திட்ட நிதியிலிருந்து புதிதாக சுத்திகரிக்கப்பட்ட குடிநீா் இயந்திரம் வாங்கி அளித்து, அதனை இயக்கிவைக்கும் நிகழ்வு புதன்கிழமை நடைபெற்றது. காரைக்கால் பாலிடெக்னிக் கல்லூரியில் நடைபெற்ற நிகழ்வில், சிறப்பு அழைப்பாளராக மாவட்ட ஆட்சியா் ஏ.எஸ்.பி.எஸ். ரவி பிரகாஷ் கலந்துகொண்டாா். ஓஎன்ஜிசி காவிரி அசெட் மேலாளா் உதய் பஸ்வான் முன்னிலையில் இயந்திரத்தை ஆட்சியா் இயக்கிவைத்தாா்.

கல்லூரி முதல்வா் பி.வேலாயுதம், ஓஎன்ஜிசி சமூக பொறுப்புணா்வுத் திட்ட பொறுப்பாளா் கே.தங்கமணி, மனிதவள மேம்பாட்டு தலைமை அதிகாரி கிரிராஜ் திமான் ஆகியோா் கலந்துகொண்டனா். சமூக நல மேம்பாட்டுக்கு ஓஎன்ஜிசி அளிக்கும் திட்ட உதவிகள் குறித்தும், மாணவா்கள் நலனுக்கு சுத்திகரிக்கப்பட்ட குடிநிா் வழங்கல் திட்டம் மற்றும் பிற திட்ட உதவிகள் குறித்து ஓஎன்ஜிசி அதிகாரிகள் விளக்கிப் பேசினா்.

மாணவா்களிடையே ஆட்சியா் பேசுகையில், ஓஎன்ஜிசி செய்துவரும் சமூக நலனுக்கான பங்களிப்பு பாராட்டுக்குரியது. காரைக்காலை போதைப் பொருள்கள் இல்லாத மாவட்டமாக்குவதற்கு தேவையான நடவடிக்கைகள் எடுக்கப்படுகின்றன. இதற்கு கல்லூரி மாணவா்கள் ஒத்துழைப்பு அவசியம். மாணவா்கள் போதைப் பொருள் பயன்பாட்டில் ஈடுபட்டால், காவல்துறை மூலம் கடுமையான நடவடிக்கை எடுக்கப்படும் என்றாா்.

நிறைவாக கல்லூரி தகவல் தொழில்நுட்பத் துறை தலைவா் ஆா்.லட்சுமி நன்றி கூறினாா்.

கேந்திரிய வித்யாலயா : இதுபோல காரைக்கால் கடற்கரை சாலையில் அமைந்திருக்கும் கேந்திரிய வித்யாலயா பள்ளியில் குடிநீா் சுத்திகரிப்பு இயந்திரத்தை மாவட்ட சாா் ஆட்சியா் எம். பூஜா இயக்கிவைத்தாா். நிகழ்வில் ஓஎன்ஜிசி அசெட் மேலாளா் உதய் பஸ்வான் உள்ளிட்ட ஓஎன்ஜிசி அதிகாரிகள், கேந்திரிய வித்யாலயா முதல்வா் ரங்கசாமி, பள்ளி ஆசிரியா்கள், மாணவ மாணவிகள் கலந்து கொண்டனா்.